L’i a totè chouârtè dè lârè; di piti malin, ou bin di brouyà. Lè brouyà chon lè pye rujâ. Lè piti malin chè fan pâ yètâ. Fô avê de l’èchpri è dè la hyinthe po pâ chè fére prindre. Robâ, chi mo, i vin du le viyo franché «dèrober». Le lârè vin achebin dou mo «ladre». L’i a lè piti lârè, kemin lè marâdeu, lè brakonyé. L’i a tan dè fathon dè robâ, alâdè chu le dikchenéro, vo j’in trovâdè on mache.

L’è on dèfô, on vitho, ke l’è chovin dè famiye. Voli-vo ouna pràva? Din ouna dè hou famiyè, le premi bouébo irè vinyê ou mondo. Irè adi to frè, adi pâ lavâ, lè dzouno parin iran èmêrvèyi. Le chènia irè on dè hou barbotèri fameu. L’avê di dê a krotsè ke l’i vinyan dza dè chon chènia. Por akothemâ prou vuto chon poupon a la pratika, l’i pachâvè di medâyè, di pithè dè mounêya dèvan le nâ. Le piti…