A la méjon, la dona no j’in fajê du tin j’in tin. Pye chyâ po la marinda. Chuto derin l’evê. M’in chovinyo bin, infan, no no rèdzoyivan kan, in intrin a l’othô. La boun’ôdeu dè chi pan i pomè, no j’inpyâvè le «pouârtamoka».
In chi tin, rin n’irè pêrdu. Lè koujenêrè l’avan pâ tru dè mounêya, fayê bin lou dèmenâ. L’avan achtou fê d’inkotyi ôtyè po betâ chu la trâbya. È chin avu pou d’afére. Lè famiyè èthan bin pye grôchè, adon, l’an prou chur aprê a tsouyi.
Po chi rèpé, la dona inpyèyivè di richto dè pan ke tsapyotâvè in pititè lètsè. Din la pila a frekachi, lè fajê a rèvinyi ou buro, djuchto po lè brondenâ la mindra. Apri, lè mèhyâvè avu lè pomè fondyè è na tyèta dè chukro. Le pan lêrdjiremin bourlâ, le kakao bon tsô ke foumâvè adi din le potè, mon Dyu ke chin irè bon!
Kan l’invide mè…