L’è le momin dè botyatâ nouthrè fenithrè. I bon Chuiche, l’è konchèyi dè l’i betâ di dzèranyon. L’è kan mimo chin ke fâ le pye bi l’èfè. Din le viyo tin, no lè vouêrdâvan d’evê, kotyè tin a la kâva, pu ou premi furi, intrè lè drobyè fenithrè po lè teri in-n’an, tantyè ke lè dzalàyè l’ôchan pachâ. Di drobyè fenithrè, n’in d’a rin-mé; di dzèranyon bon martchi n’in d’a a borè.

In inkotsin mè tyéchètè yô la têra irè chobrâye du l’outon pachâ, l’i è trovâ on mache dè koteru! L’è j’é fyê i korbé, ke chè chon rèvondâ, m’an prècheke fê on fôri! L’è farmo galé, kan lè ramirè chon dinche botyatâyè. Me n’ami Netton m’a kontâ on chovinyi dè chon dzouno tin: Iran trè bouébo, dza on tro in n’an. Dremechan ou pêyo dèchu, le chènia è la dona ou pêy’dèjo. Lé-hô, l’avan ouna galéja loyèta, è di dzèranyon,…