On dechando matin, che vo chédè pâ tru tyè fére, vinyidè fikotâ ouna vouèrbèta pê Bulo è vo dèkràvèri lè tsapi dè têla bregolâye dou piti martchi ke chè tin a la pyathe Chin-Dèni. L’è ôtyè d’intrètsantâre ke vo bayè l’invide dè vo j’arèthâ ouna vouèrba.

L’è prouchur pâ le martchi folklorike, lè dzin puon chorkèyi chin chè fére a troupâ. L’i a rin dè hou martchan dè freloutsichè ke brâmon di chindzèri a to tyâ, ma, di primeu, di vindyà dè règalârda, on bolondji, on bouébo ke vo propoujè dè la konfitura méjon è adi bin d’ôtrè gormandi. Vo puédè agothâ dou pan kouè ou fu dè bou, di chouchechè, dou bakon, dou fre, di motètè, di brèchi, dou vin è mimamin di koukiyè. Chin ke bayè on pyéji grô, l’è dè rinkontrâ di dzin ke chè krêjon chin chè fére groba-pota, prinnyin liji dè chè dre bondzoua…