No j’arouvin to bounamin ou furi. La chajon yô to va rè-hyori. La têra keminthè a frebiyi, lè tsaton di kàdrè chon fro; lè hyotsètè dè nê è lè kenoyètè bayon di galéjè kolà ou kurti adi indremê. La tôpa l’a pâ oubyâ dè tsanpâ cha premire dêrbounêre.

L’i a tan dè mo po dèvejâ di hyà. Mè chovinyo ke kan iro dzouna, lè dzin dejan on botyè po totè lè chouârtè dè hyà. Irè pâ «kuyi di hyà», irè «ramachâ di botyè». Adi ôtyè dè drôlo: fére on botyè irè «fère na hyà».

Kan on dèvejè dè hyà, l’è pâ rintyè po lè botyè, vo chédè prà, l’è chin k’on èhyorâvè ou dèchu dou dyètso dè lathi… kan le lathi irè grâ! On’in tràvè adi pê bouneu, l’è râ, ma l’è farmo bon, è l’è min tchyê, tyè chi ke no vindon din di bouêthè. Le lathi no bayè la hyà, i no bayè achebin le fre. Kemin lè j’âbro!

Vo vêdè kemin le patê l’è konplikâ po hou ke volon l’aprindre. Adon por vouè, vo lécho mèditâ. Ma oubyâdè pâ d’alâ vouityi din lè prâ (dèvan ke lè j’ôchan chèyi) totè lè balè hyà ke no bayè nouthra dona, la têra.

Anne Marie Yerly

Parmi les fleurs

Nous arrivons gentiment au printemps. La saison où tout va refleurir. La terre commence à frémir, les chatons des noisetiers sont sortis; les perce-neige et les crocus donnent de jolies couleurs au jardin encore endormi. La taupe n’a pas oublié de pousser sa première taupinière.

Il y a tant de mot pour parler des fleurs. Je me souviens que lorsque j’était jeune, les gens disaient en patois, un bouquet (ce n’était que la fleur elle-même) pour toutes les sortes de fleurs. Ce n’était pas cueillir des fleurs, c’était ramasser des «bouquets». Encore quelque chose de drôle: faire un bouquet, c’était en patois «faire une fleur».

Lorsque l’on parle de fleurs, ce n’est pas que pour les fleurs, vous savez bien, c’est ce que l’on levait au dessus du baquet de lait… quand le lait était gras! On en trouve encore, heureusement, il est rare, mais il est très bon, et moins cher que celui que l’on nous vend en boîtes. Le lait nous donne la crème, il nous donne aussi le fruit (le fromage). Comme les arbres.

Vous voyez comme le patois est compliqué pour ceux qui veulent l’apprendre. Aussi, je vous laisse méditer. Mais n’oubliez pas d’aller voir dans les prés (avant qu’ils ne soient fauchés) toutes les belles fleurs que nous donne notre mère, la terre.

Anne Marie Yerly