Nouthra-Dona

En patois
En français

Nouthra-Dona dè Paris! Nekoué konyè pâ chi grô mohyi ke l’è j’ou bâti in l’an milè-than chuchant’è trè. Outre mé dè dou chyêkle, brâtha-mortê, tsapouè, fâvre è chinpyo j’ôvrê, chovin payi a kou d’èchkourdyà, l’an travayi por èdifyâ ha grôcha bâtiche.

Chi grô bâtimin l’a travèchâ mé dè vouè-than j’an d’ichtouâre: la dyêra dè than-t’an, le chakro dè Napoléon. Victor Hugo no j’a kontâ l’ichtouâre dè la galéja Esmeralda è dè Quasimodo le margiyé dè Nouthra-Dona. Ma, nekoué l’a dèvejâ dè lou j’infan? Nyon! Vêdè-vo, in chi tin kemin vouè, n’in d’a ke chon vinyê retso è di j’ôtro chon chobrâ pouro.Di pouro j’ôvrê, chovin chin travô. On pou n’in vêre adi vouè, chôrkèyin dèjo lè pon dè Paris. Le kà pèjan i vouêton Nouthra-Dona chè gondolâ chu l’ôtra ruva.

To por on kou, chorèprê, l’an apèchu on felè dè foumêre ch’invôlâ du dèjo la granta danye. «Ou fu! Nouthra-Dona chupyè», ke l’an bramâ. Dè rido lè hyanmè l’an fotu bâ la granta danye. Pê bouneu, lè ponpyé l’an fê di mèrâhyo è l’an chôvâ di retsèthè. L’è trichto dè vêre ouna bâtiche dinche ch’indalâ. Ma... apri lè bidon d’ivouè, chon arouvâyè lè bèrôtè d’êrdzin ke l’an vêchâ chu Nouthra-Dona. Adon, kan l’é oyu dèvejâ dè hou thantannè dè milyon, mè chu de:
Che di kou n’in d’an tru, poran poutithre fére ôtyè po lè dèchindin a Esmeralda è Quasimodo, ke chon adi dèjo lè pon dè Paris. Chin lou bayèrè a kondji dè tsandji lou jilè dzôno kontre ouna bala vithire.

Bèrnâ Chaney

 

 

Notre-Dame

Notre-Dame de Paris! qui ne connaît cette cathédrale, qui fut bâtie en l’an 1163. Pendant plus de deux siècles, maçons, charpentiers, menuisiers, forgerons et simples ouvriers, souvent payés à coup de fouet, ont travaillé pour édifier cette grande bâtisse.

Ce grand bâtiment a traversé plus de 800 ans d’histoire: La guerre de Cent Ans, le sacre de Napoléon. Victor Hugo nous a raconté l’histoire de la jolie Esmeralda et de Quasimodo, le sonneur de Notre-Dame. Mais, qui a parlé de leurs enfants? Personne! Voyez-vous, en ce temps-là comme aujourd’hui, certains sont devenus riches et d’autres sont restés pauvres. De pauvres ouvriers, souvent sans travail. On peut en voir encore, traîner sous les ponts de Paris. Le cœur lourd, ils regardent Notre-Dame se prélasser sur l’autre rive.

Tout à coup, surpris, ils ont aperçu un filet de fumée s’envoler du pied de la grande flèche. Au feu! Notre-Dame brûle, ont-ils crié. En peu de temps les flammes ont abattu la grande flèche. Heureusement, les pompiers ont fait des miracles; ils ont sauvé des richesses. C’est triste de voir une telle bâtisse s’en aller. Mais… après les seaux d’eau, sont arrivées les brouettes d’argent, déversées sur Notre-Dame. Lorsque j’ai entendu parler de ces centaines de millions, je me suis dit:

Si parfois ils en ont de trop ils pourraient peut-être faire quelque chose pour les descendants d’Esmeralda et Quasimodo, qui sont encore sous les ponts de Paris. Ça leur donnerait l’opportunité de changer leurs gilets jaunes contre un nouveau vêtement.

Bernard Chaney

Catégorie: 

Annonces Emploi

Annonces Événements

Annonces Immobilier

Annonces diverses