Avu le mi dè mé, lè j’armayè è lè j’armayi chinton ke lè dyora le momin d’la poya. Ma vouè, i chu pâ dè chajon, è i vé vo dèvejâ d’ouna rindya. Gérard Morâ, dè Gumefin, ke l’a tinyê vint’è-chat’an lè Reybes, pri dou Moléjon, faji cha dèrire ryndya, li-ya dè chin dou j’an. Din chon tsalè, Gérard trintchivè, avu l’âdzo, li-ya fayu chè rèjinyi a pyéyi bagâdzo. Po cha dêrire rindya, Gérard è chon tropi chon jou betâ in yuva pê Philippe Huwiler, journalichte a Radio Friboua. «Adyu l’armayi, la dêrire rindya dè Gérard Morâ», tinke chin ke l’omo dè radiô l’a bayi a oure a chè j’ôditeu è l’a bin chu betâ in n’an to le travô ke chin bayè po ouna rindya, du le tsalè tantyè a la méjon.

Po chi bi «reportage», Philippe Huwiler l’a rèchu dariremin le «Prix Média de l’Union suisse des paysans». Tot’a l’àra, Philippe l’a de ke chi pri irè chi dè Gérard. Bin chur k’irè farmo rèvèrâ, è irè chuto kontin dè bayi ouna bal’èmâdze dou travô di j’armayi ke tinyon montanye; achebin dè rè dre ke l’y a tan dè balè tsoujè a vêre è a mantinyi in Grevire.

Ora ke Gérard chàbrè ou bâ, l’arè achurâ ouna lègrema kan li fudrè oure la brijon di chenayè, avu tan dè bi chovinyi. No li kouâjin, é achebin a cha famiye, on bon tsôtin è ke vouèrdichè cha nyêrga.

Vonvon Kolly

Un prix bien mérité

Avec le mois de mai, les vaches et les armaillis sentent que c’est bientôt le moment de la montée à l’alpage. Mais aujourd’hui, je ne suis pas de saison, je vais vous parler d’une désalpe. Gérard Morard, de Gumefens, qui a tenu 27 ans les Reybes, près du Moléson, faisait sa dernière désalpe, il y a de cela deux ans. Dans son chalet, Gérard fabriquait le fromage et avec l’âge, il  dut  se résigner à plier bagages. Pour sa dernière désalpe, Gérard et son troupeau ont été mis en vue par Philippe Huwiler, journaliste à Radio Fribourg. « Adyu l’armailli, la dernière désalpe de Gérard Morard », voilà ce que l’homme de radio a donné à entendre à ces auditeurs, il a bien su mettre en avant le travail que donne  une désalpe, depuis le chalet jusqu’à la maison,

Pour ce reportage, Philippe Huwiler a reçu dernièrement le Prix Média de l’Union Suisse des paysans. Tout de suite, Philippe a dit que ce prix était celui de Gérard. Bien sûr qu’il était fort honoré, il était surtout content de donner une belle image du travail des armaillis qui tiennent montagne et aussi de redire qu’il y a tant de belles choses à voir et à maintenir en Gruyère.

Maintenant que Gérard reste en plaine, il aura sûrement une larme quand il entendra le son des cloches des vaches, avec de si beaux souvenirs. Nous lui souhaitons, ainsi qu’à  sa famille, un bel été et qu’il garde sa joie de vivre.

Vonvon Kolly