Deché-delé

Pâ alêgro d’ithre dzouno, din lè j’an karantathinkanta. L’i avê tyè lè parin, le réjan è Moncheu ke l’avan réjon. Irè tyachon dè djindre. N’in konyecho yon, kan irè to dzouno k’amâvè tan la mujika, i tsantâvè bin, è po dzuyi a la fanfàre, l’avan pâ fôta dè konthêrvatouâre in chi tin. L’arè rin kothâ a chè parin. È bin le chènia irè kontre, to irè de!

Po fére partya dè la chochyètâ dè mujika, din nouthron velâdzo, lè j’omo (rin dè fèmalè bin chure) dêvechan achebin fére partya dou tsan, chu la louye. Irè on pechin bi kà. Totè lè demindzè inke, è pâ rintyè a la Mècha, a Viprè achebin!

Mon koujin Jean-Jo, na bala vouê dè bâcha dza to dzouno, l’a dèmandâ por intrâ din la chochyètâ. Irè pâ rin! L’è j’akchèptâvan rintyè apri on vote a buletin chèkrè. N’in d’avi yon parmi lè viyo…