Deché-delé

Ora ke lè rindyè chon pachâye, ke lè tropi chon ou bâ, li-yè le momin dè moujâ a la Bénichon d’la montanye. Ô, du li-ya dza bin kotyè j’an, ha bala kothema l’a bin pôma di pyàmè. Bin chur, chin ke n’è pâ oubyâ, l’è le to bon rèpé ke chè tràmè outoua dè ha fitha. Po prà dè parin, l’è l’èpâhyo d’invitâ ti lou j’infan è piti-j’infan, por ouna rinkontra outoua d’ouna granta trâbya, yô la tsanbèta è to chin ke virè outoua l’è bin in yuva. I konyecho ouna fêrma a Pon’na-Vela, yô, ti lè j’an, in dèpye d’la famiye, on prèfè ou bin on grô bounè dè pêrd’avô irè achebin din lè j’invelè.

Avu l’âdzo, on chè rapalè ke kan on irè dzouno, on chè rèdzoyivè dè vêr arouvâ la Bénichon, por alâ danhyi. Din mon velâdzo, no j’avan la tsanthe d’oure «Lè Charlys» dè Friboua, ke menâvan la danthe. Lè…