Deché-delé

Chevire, mè rapêlo bin le dzoua yô l’é fê ta rinkontra, t’irè bin cholèta, adotya kontre na parê. Pourèta kemin na genanta, din na kotse bin chonbra de l’èthrâbyo di Tsan-di-Moulin a Jules, mon pér-gran. T’irè prou chure rèvoucha din chti l’indrê du on pâr dè j’an. Djêmé kokon tè gugâvè. Inutila, t’irè abandenâye. Mônèta, krovâye dè bàja chètse, râja dè putha, yô lè j’aranyè l’avan trovâ pyêthe po techotâ lou têla. Po hou bèthètè, èthê prou chure on piti paradi.

Ma chevire, che te chavé kemin chu benéje dè t’avê teri fro de la mijére.

Tè ke t’avi pachâ ta ya a tragalâ rintyè de la bàja. L’é pâ volu tè vêre chobrâ trichtounèta, ou bin karotâye pê di j’ôtro, chin rèchpè, adon t’é prêcha din mè man. T’irè bin tru bala po tè léchi muri dinche. Ora ti rèchuchitâye, tota chejinta,…