Tsapala Chinte-Nanèta ou bâ dou Liderrey (Tèkchte teri in partya dou lêvro «Vallées de la Jogne et du Javro, les sanctuaires» dè Marcel Perret

Po keminhyi, kotyè mo d’ichtouâre. Din la bible, no tràvin rin dè chartin chu la ya dè Chinte-Nanèta, dona dè la Vyèrdze-Maryè. Bin chur ke Nouthra-Dona l’a bin j’à ouna dona. Kemin l’è a non vertâbyamin? Nyon le châ! Lè dichiplè et lè j’apôtre chè chon pâ tru intyètâ. Vekchan ou toua è po le Krichte. Ma, on tràvè di trache dè kulte a ha mére-gran du le chijimo chyêkle. Chi kulte chè èpantchi din tota l’Europa. On mache dè mohyi è dè tsapalè chon bâti a l’anà dè Chinte-Nanèta, achbin di tablo, contro lètchin le chèlêbro rèformateu Martin Lüther l’a grantin lutâ. È tyè vin fére Chinte-Nanèta in Tsarmê? On châ pâ! L’è la famiye Carruptet dou Prâ ke l’a fê bâti chi chanktuéro in mil-katrothin dji. La tsapala l’è j’ou rechtorâye intrè mil-thinthin nonantè-chate è mil-chithin ondzè. Ora, l’è la pèrotse dè Tsarmê ke l’è propriètéra.