Deché-delé. On dechando ke ne pori djêmé oubyâ.

Le dechando d’la bénichon dè Tsêrmê, dou fidélo tinyâre, l’an fyèrtamin pachâ din le velâdzo, avu lou tropi dè nêrè, galéjamin dèkorâye dè bochon hyoratâ è dè hyà divêchè. On konchê dè chenayè, dè hyotsè routse è klankètè è lè ho, ho ho di j’armayi. E pu le tipiko trin dou tsalè teri pê dou tsavô bin farâ è grelotyére daveron lou kou. E vo dzouno j’armayi din vouthrè balè vithire, bredzon brodâ d’la bal’èthêla, è vo dzounè fiyè din vouthrè bi dzakiyon, è vo lè piti j’infan, vo j’éthè la rèlêva dè dèman. On di tropi vinyê de l’alpâdzo dè Vounetz, la famiye Piller; l’ôtro dou tsalè «la Gîte de Joux» vê Mothèlon, la famiye Pipoz dè Tsêrmê.