D’evê, lè dzoua chon kour, pâ fôta d’ithre on chavan po dre ke lè né chon grantè. Chovinyidè-vo di balè vèyè dè nouthron dzouno tin, a no lè viyo.

Kan no j’iran infan, on chè betâvè chu le forni, kotyè menutè dèvan d’alâ dremi. Dzounè fiyè, no l’i betâvan lè lèvè ouna bouna vouêrba, po ke chan on bokon tsô; pêrmo ke lè tsanbrè yô no dremechan, iran frêdè. Mè frârè, on dechando, chè ch’iran lavâ la titha dèvan d’alâ dremi, (rin dè chètyà vo moujâdè bin) è bin, kotyè j’àrè pye tâ l’avan di yachon chu lè pê. Irè parê po to le mondo, din lè viyè méjon.

Inke don portyè lè dzin chobrâvan ou pêyo le pye grantin pochubyon. Lè j’omo yêjan lè gajètè è lè fèmalè trikotâvan, in akutin la radyô. Pèjubyè vèyè, chu chenanna.

Ma adon la demindze né, no j’avan lè fameu «kâfé-nê». Lè tyintè ritè! N’in d’avê ke vinyan por èprovâ dè teri le pantè i fiyè, di j’ôtro chuto po tsantâ, on kou, no j’an tsantâ du djij’àrè a duvè j’àrè dou matin chin rè pyakâ, è pâ dou kou la mima. On danhyivè on bokon, avu on viyo «gramofone» a menèvala, on le betâvè chu le forni, chu la trâbya i dèrayivè, a kouja di danhyà ke fajan a gurlâ lè pounè!

Pu no dzuyivan a di dju: A la rata-bouârna, din tota la méjon. I kârtè ou chibre, a la pota, ou fou, a la bataye, ou binokle. È byochi le minton chin rire? Vo l’i chure achebin fê. È du tin j’in tin kotyè krouyè fâchè a hou ke fajan tru lè malin.

On vèyê pâ le tin pachâ. No j’avan portan rin dè tèlè, è, po dèvejâ patê no j’avan adi pâ fôta dou dikchenéro.

Anne Marie Yerly