L’i a na thinkantanna d’an, lè viyo dejan ke le tèâto patê terivè chè dêri chohyo! Tyè moujâdè-vo dè chin?
Ti lè j’an, du bin grantin l’i a ôtyè ke chè pâchè din lè velâdzo. Lè chochyètâ dè dzouno, lè moudè è kothemè è lè j’amikalè dè patêjan organijon di balè vèyè, di komèdiyè, di grôchè balè pithè, prà dè tsan novi, to chin in patê. Ditè-mè pâ ke l’è on dêri chohyo!
Le tèâtro patê, l’è veré, l’a tsandji on bokon. Lè dzin vouè, chon akothemâ a vêre dè to, din le «karon vijenê». L’an pâ-mé tan invide dè pyoratchi è dè chenupâ avui di grô drame. Fo dre ke l’è j’akteu achebin l’an dou pyéji dè dzuyi ôtyè dè vi, ke rêmouè è ke fâ dou bin a intindre.
Adon a Chorin, ou mi dè fèvrê, vo j’in d’arè po vouthron bouneu. La chochyètâ di Dzouno dzuyièrè Mamadou ouna galéja fâcha dè Nono Purro.
Lè devindro: 14 è 21 a 20 h. Lè dechando: 15 è 22 a 20 h. La demindze 16 a 16 h le dumidzoua.
A vêre le pyiéji ke l’an hou dzouno a rèkordâ, a vouêrdâ è dzuyi chi galé patê, fô pâ avi tru pouêre po l’avinyi.

Anne Marie Yerly