Trè mâdzo, di dzin farmo inchtrui k’ètudèyivan lè j’èthêlè è to chin ke l’i avê din la yê è chu la têra, vinyan du le Lèvan. Lou rètsêrtsè l’è j’an amenâ in Palèchtine yô i dejan k’on infan rê irè vinyê ou mondo.
L’an prèparâ chi gran voyâdzo, l’avan lè moyin. Chè chon betâ in route por alâ rindre vijita a chi novi rê. Le voyâdzo ch’è fê a pi è avu di kamélo, bin chur; lè j’avyon, lè j’oto è lè trin ègjichtâvan pâ. Po lou diridji i chuêvechan oun’èthêla, l’avan rin dè kalamita nè dè GPS. A Jèrusalèm chè chon rinchènyi vê le Rê Hérode k’irè tot’èkafoudi d’aprindre k’on Rê di Djê irè vinyê ou mondo. L’ou j’a dèmandâ dè rèpachâ kan l’i cheron jelâ. Ke voli achebin alâ l’adorâ.
To t’in chuvechin l’èthêla, nouthrè trè voyadjà chon arouvâ a Bethléem. L’an trovâ l’Infan din na krouye kabôla, kutchi din ouna rèthe, on bà è on’âno rètsoudâvan chi piti dè lou bèda alêna. Marie ch’okupâvè dè Li. Dzojè l’avê proumatêre a fére avui chè bithè è a rèchuêdre lè fayê. È bin, la chorèprêcha l’è arouvâye avui hou trè Rê, ke vinyan du farmo yin.
Gachpâ, Mèlkiâr è Batajâ iran pâ arouvâ lè man vudyè. L’an ofê a chi l’Infanè dè l’ouâ, dè l’inthin è de la mira (di pyantè odorifèrintè dè l’Arabie). L’an achebin prèyi, pu menâ l’andyèta avui Marie è Dzojè.
Pê mèrâhyo, ch’on j’ou avêrti dè pâ rèpachâ vê Hèrode, irè tru dondzerà po l’Infan, ke dejan. Chè chon rètornâ intye-là pê on’ôtro tsemin.

Henri dè Tsathi chu Monthêrvin