Che l’i a ouna kotse dè têra ke l’a de l’oroye, l’è bin le payi fribordzê. Vo j’i rèmarkâ, totè lè chenannè, din lè gajètè, vouéro dè konchê dè tsan, dè mujika. Fudrè chè findre in katro por alâ a totè hou prèchtachyon.

On pou dre ke la kultura l’è in bouna pyêthe intye-no. No puin betâ ou dèfi bin di tyinton po le nonbro dè chochyètâ ke no j’an, d’apri le nonbro dè j’abitan.

Le mindro piti velâdzo l’a chè tsantre è chovin chè mujichyin; ke fan pâ tyè de la mujikèta ou bin dou bêka-kan-mè! Lè dirèkteu ou dzoua d’ora chon bin formâ, n’in d’a ke chon achebin konpojiteu. Fidélo a lou chochyètâ, chàbron grantin ou mim’indrê; chêrtin, du l’i a mé dè vint’an. Pu ke chon bin amâ.

Fô dre achebin ke din lè j’èkoulè, i fan on bokon dè cholféje. Kan y arouvon din on kà è ke chan dza lè notè, l’è pye fachilo d’aprindre. Parê po la mujika; on yâdzo, betâvan lè dzouno avu lè grô, i chuêvechan pye ou min bin. Ora l’an le konchèrvatouàre, di lethon a lou mèjera, bayi pê di profècheu chuti è kapâbyo d’inchènyi.

On payi ke tsantè, lè on payi bènirà!

Anne Marie Yerly