Fô-the n’in rire, fô-the pyorâ? Bouna kèchtyon. I yêjo vouè din la gajèta, ke l’i a di dzin ke l’an organijâ di chéanthè dè rire! Chè rinkontron, din on’indrê, ouna châla, pu chè beton a rire chin réjon, rintyè po chè fére dou bin, ke dyon. Che fô keminhyi a ithre forhyi dè tsanpâ-fro chon dzouyo, rintyè dinche, pachke l’è le momin dè le fére… è bin va mô. Krêdè-mè.

Mè chinbyè ke lè vêyo arouvâ a hou rinkontrè. Chu le tsemin, i pâchon bi drê, prèchâ, chin nyon chaluâ. I arouvon lé. Pu adon, puchke l’an payi po chin, i chè beton a rèkathalâ lè j’on dèvan lè j’ôtro, in fajin di minè. D’apri la foto, l’an pâ l’ê d’ithre a la bènichon. Lè vejâdzo chon gri, lè marmàlè charâyè. L’è dou rire chin? Âmèri bin lè vêre kan i rèmodon; fan-the adi la pota? Van-the chaluâ lou vejin avui on bi fôri? Poutithre.

Le rire i dê vinyi dou kà, kemin lè lègremè d’ayeu. Le richto l’è tyè de la komèdia.

Anne Marie Yerly