N’in d’a pou ke chon ou kouran dè to chin ke chè fâ po le patê. No j’ôtro, din le tyinton, no l’èkrijin, no le dèvejin adi, di dzouno è di min dzouno van l’ètudèyi è lè téâtro chon adi bin amâ. Ma, l’i a pâ tyè no. Lè Valijan, lè Chavoyâ è din totè lè kotsè dou Franco Provencal, le patê chè mantin. È pâ rintyè pê di viyo.

A Noutsathi, ou Glossaire di patê, yô l’an rèkordâ ti lè j’èkri è ti lè j’inrèjichtrèmin du l’i a mé dè chaptant’an, l’i a di pèrchenè, on porè dre di chavan, ke l’an intrèprê on grô è bi travô. Ti l’è j’èkri chon tranchlatâ in franché, totè lè j’èmichyon radiô in patê achebin. Dinche on porè totavi l’i alâ, rèyêre è intindre hou trèjouâ, è chuto lè konprindre. Avu on bokon dè pahyinthe, to cherè betâ chu Internet. Ma vo puédè krêre ke l’è pâ j’ou on piti l’afére. Ouna tropa dè j’ètudiyan, di «doktoran» mimamin, l’i travayon du l’i a dza bin kotyè mê, è ch’on pâ ou bè dè lou pênè.

L’è j’ou l’èpâhyo dè lè vêre travayi. È bin no lou dêvin na fyêrta tsandêla. Fô vêre kemin i fan chin, ou pye pri dè lou konhyinthe. Chè van rinchènyi deché è delé. I chon bin konhyin ke chin i va chobrâ. Chi trèjouâ va prindre adi mé dè vayà po lè jènèrachyon ke vinyon.

Anne Marie Yerly