Adon, a tyè fô-the moujâ kan on vo j’intin chenâ? Galéjè hoytsè. Vo j’ithè lè novalè dou payi è di pèrotsè; è portan, ou dzoua d’ora, pâ por ti. Bin di vejin vo byâmon, vo vo fédè a mô vêre. In grô, vo lè dèthorbâdè.
Po di j’ôtro, vo j’ithè chejintè è dzoyàjè, din lou ya è din lou kà. Ti lè dzoua vo tsantâdè lè j’àrè, l’è poutithre inke vouthron merto ou bin vouthon krimo.
Hyotsè, chu divê ton vo piorâdè la mouâ d’on pèrotsin: on ton prèvon che l’è on omo, moyin che l’è na fèmala, è pye hô che l’è on’infan. Pitita hyotse lêrdyèta vo j’anonhyidè lè batyimo. È pu a dutrè, vo chaluâdè lè novi marytson. Dèvan lè j’ofitho dè la demindze, vo tchirâdè lè fidélo po la prèyire. I grantè fithè, vo trèkordenâdè alêgramin. Din lè tyinton katolike vouthrè vouê tsanton lè j’èmâryè matin, midzoua è devêlené.
L’i a dè chin on pâr dè j’an, vo chenâvà adi le dechando dumidzoua, la fin dou travô po lè j’ôverê. Kan lè j’orâdzo, la grêla menachivan, betâvan in branle na pitita hyotse. Lè j’anhyan l’an adi le chovinyi de la dyêra, kan vo j’i anonhyi la mobilijachyon, è achebin, din le dzouyo, la pé rèvinyête.
Vo j’an bayi di non, di bon parin, di bounè marênè. Vo j’ithè adi inke, cholidè, vayintè, imortèlè. No vo j’intindrin adi grantin.

Gérard Rime