Kemin totè lè linvouè, le patê l’a chè drôlèrâ. Le dzoua yô no dèvejèrin le vertâbyo bon franché l’è pâ po dèman. L’i a rintyè a intindre lè radiô è yêre chèrtênè gajètè, po trovâ di fôtè grôchè kemin le Molèjon. Adon, vo moujâdè bin ke nouthron pouro patê (ke l’a djamé pu chè fyâ a ouna gramére) l’è pyin dè kontradikchyon.

L’è po rin dè chè kontrèyi, dè batayi por on mo dè travê, adon ke no fan to chin ke no puyin po kudji vouêrdâ chin ke n’in chàbrè. Ma l’i a toparê di mo pâ fachilo a rèyi.

Ègjinpyo: le vèrbe dèvejâ, on pou achebin dre parlâ. Chin dèpin to chin ke vo volê dre. Kan on di: «L’é dèvejâ avu mon chènia de n’afére ke l’a arouvâye.» Le chènia vo rèpon: «Ouê, l’è dzin n’in d’an parlâ». Vo vêdè ke l’è pâ totafé parê. Dèvejâ vou bin dre dichkutâ, fére ouna konvèrchachyon; parlâ cherè pye chyâ po dre ke lè dzin n’in d’an batayi intrè là.

On ôtro mo: pèliche: on’ in tràvè katro din le dikchenéro. Ouna pèliche l’è kôkon dè mégro, malingrenà, krouyo. La pèliche l’è chin ke l’i a dèjo l’èkouâcha d’on âbro (aubier). La trèjima l’è achebin on’ âyon. Lè pèlichè chon lè pyumichè.

L’è pâ rintyè avui le dikchenéro ke vo j’alâdè aprindre a dèvejâ è a èkrire. I fudrè onko rèkordâ. Bon korâdzo.

Anne Marie Yerly