Dou patê; on in tràvè din ti lè kâro. Adon ke l’a tan grantin godji a l’onbro, ke tan dè dzin, mimamin di viyo oujâvan pâ-mé le dèvejâ, è bin ou dzoua d’ora, l’è lè dzouno ke l’i bayon chon rènovi.
Bin chure ke l’a fayu di viyo kemin no j’ôtro pou l’ou j’aprindre, ma l’i chè chon farmo bin betâ. La pràva: prà dè chochyètâ dè dzouno chè beton in mandzeron è dzakiyon por alâ tsantâ le mi dè mé, è i tsanton in patê. L’è pâ rin chin. On arè djamé yu chin l’i a trint’an in êrê.
Grâthe i lethon ke l’an rèchu din lè j’èkoulè, du l’i a dza bin kotyè j’an, dzouno è fiyè l’an keminhyi a l’amâ, a le dèvejâ. Pu ora chè beton a dzuyi di galéjè pithè.
Dèman, I dzuyèron po l’achinbyâye di patêjan a Vuadin. La demindze apri, trèdzè d’âvri a duvè j’àrè le dumidzoua, cherè la chéanthe publike. Din la châla dou Kabarè de la Gâre. «On charayon ou kà dè karda.» Che vo chédè pâ chin ke l’è tyè di kardè, è bin vo j’i tyè a konchultâ le dikchenéro!
Ha galéja fâcha, pyêna dè galé rèvi, l’è betâye in thêne pê Christine Overney-Ruffieux è dzuyête pê di dzouno j’akteu-patêjan. Pu apri, cherè le kà di patêjan Intrè-no de la Charna ke vo tsantèron lou pye bi tsan. Vinyidè in nonbro, vo règrètèrê pâ vouthra vêprâ.
Anne Marie Yerly