Kan no majalâvan a la méjon,  le « tya-pouê » fin gorman è chuti majalê,  no  betâvè le lâ d’apâ. No le tayivan in piti karelè pu no le betâvan a fondre to bounamin chu le fu, din on grô po. Piti a piti, i keminhyivè a kouêre.  Kan irè bin fondu ( l’i fayê kotyè j’àrè), di pititè gràbè rochètè montâvan ou dèchu. No j’èhyorâvan chin avui la potse-pèrhya. Le lâ, on kou rèvintâ, chobrâvè din di toupenè, no j’inpyèyivan chin  po frekachi lè pre dè têra dou dèdzounon.

Ma adon lè gràbè, chin irè po le kunyu. Prindè dou-thin grame dè gràbè, than-thinkanta grame dè chukro,dou j’à,trè-thin grame dè farna, demi kuyèrâ a kâfè dè bon-hyou pelâ, na kuyèrâ a choupa dè kanala pelâye, dou dèthi dè lathi è demi kuyèrâ dè lèvan in puthè.

Bin inpathâ le to. Betâ ou foua chu na pyaka, è kouêre a than-chaptanta, trè-kâr d’àra dè tin. On kou rèvintâ, l’è èchtra bon. Pu, vo puédè le medji dutrè dzoua apri, l’è onko mèyà. Kunyu dè pouro, gormandi dè retso : lè koujin de la vela kratyivan pâ dèchu.

Anne Marie Yerly