N’in d’a ke lou dyon di j’èrbètè ou bin dou rèkordon. Di j’ôtro, dou vuyèjon, dou vèrdiyon. To chin l’è di  j’êrbè ke rèlêvon le go dè nouthrè rèpé.
In tayin di brinlètè, ch’ti matin, l’é yu k’iran gravalâyè dè krouyè bèthètè rodzè ke rèchinbyon a di pevôlè, ma chon pye grôchè è pye poutè, hou monètchyâ l’an fê di j’à chu lè tijè dè mè pourè brinlètè. È hou routhè, achtou k’on vudrè lè prindre, chè léchon tsêre è van chè muchi din la têra, on lè tràvè pâ-rè.
Le pye-rochè chè pouârtè bin, ma, i va montâ, pê chi bi tin, fudrè dyora n’in chènâ in mimo tin tyè le tsafuyè.
Mon galé bochenè dè remani l’a pâ chuportâ le frê, l’è bon chè. Ma adon le pinyolè li, i menachè dza dè hyori. Dou lorié pardji… n’in dé rin.
Vo j’alâdè mè dre: «L’è tru vuto po pyantâ; l’evê l’è pâ fro!» Ché prà, ma i chu kemin lè dzeniyè, kan le chèlà i arouvè, mè fô fro. Vo konprindrê ke por vouè, cherè to!
Anne Marie Yerly