Du l’an mile chi-thin vouètant’è chê, chè tinyê din le Val dè Tsêrmê, trè fêrè pêr’ an. Di fêrè yô lè rèdzoyechinthè alâvan bon trin. Po lè dzouno, irè l’okajyon dè fithâ è dè veryoulâ avu lè grahyàjè dou velâdzo è di j’alintoua.

Din chi tin, na viye kothema bin drôla, volê ke katro dzouno, dèjinyi por ithre gârda dè la fêre, dêvechan achurâ l’ouvrâye di danthè. Por là, irè on pechin l’anà, fêrmo prijâ. Hou dzouno dèvechan achebin rèyi ouna fiye din lou proutse parintâ; to chin por inparâ lè kontrèyondzè. L’y avi kan mimo kotyè tirvunyè. Le Gouêrnèmin dè Friboua payivè ôtyè, ma lè j’otoritâ l’ou j’a fayu abouli hou fêrè, chuite a na trajike inpunya.

Dou bon j’êmi Tsêrmêjan, dè rèthèta, k’iran ou chêrvucho dou Rê dè Franthe, chè chon trovâ intye-là po l’y pachâ dutrè chenannè dè kondji è profitâ de la fêre. Vinthan Gremion è Metchi Remy, ache brâvo l’on tyè l’ôtro, èthan lè dou inkorporâ y Than-Chuiche, fameuje konpanyi, la gârde dè Luvi katouârdzè.

L’avan di yuvè chu la mima fiye. Metchi danhyivè avu li è chè krèyê dza chon prètindin. Ma l’amihyâ chebetamin, l’a veri in dzaloji. Vinthan, du, l’a pekâ la ronye. Metchi rijolâvè adi. Le ton l’è montâ… tantyè ke Gremion l’i a propoujâ dè chè batre.

Pri di j’Âchè, on indrê ke l’i dyon l’Èpenèta, l’an kroji na foucha. On di dou dèvechê l’i tsêre. Iran kemin fou, ti dou. Chè chon adon èko a mouâ. L’è j’an trovâ le lindèman, ti dou mouâ, pèrhyi pê lou j’èpé. Irè l’an dè grâthe mile cha-thin chouchanta. Ouna krê n’in rapalè adi le chovinyi.

Gérard Rime