Din lè danyè dè nouthrè mohyi, no j’an din ti lè velâdzo, di galéjè hyotsè ke tsanton lè j’èmâryè, lè nothè, lè batyimo è achebin lè mâlà. L’i a la hyotse de la grêla, ha dou fu; le bordon k’anonthè la mouâ d’on’omo, la chèkonda po na fèmala è la pitita por on infan. L’è veré k’ou dzoua d’ora, le «portâbyo» lè rinpyathè bin chovin.

Vu vo kontâ l’avantura dè l’Inkourâ d’on grô velâdzo dè Chindzena, l’i a bin di j’an. Chi Moncheu, lè dzin l’amâvan bin. Irè bal-è-bin ruchto, ma chinpyo è l’i faji rin dè chè kontchi lè botè po rinkontrâ chè parotsin ou travô. I amâvè achebin menâ lè j’ouârdyè. Adon du tin j’in tin, i grapiyivè chu la louye po dzuyi kotyè kantike, a cha djija, chin tèmouin.

Ma, on dèvêlené, prê pa cha pachyon de la mujika, l’a oubyâ l’àra. Le chakrichtin, on bokon choua, l’a kotâ le mohyi pu ch’è ind’alâ dremi. To dzoua è-the ke Moncheu chè trovâ kotâ dedin. Rin dè portâbyo in chi tin! Richkâvè rin bin chure, ma dremi din chon yi cheri kan mimo j’ou pye alêgro tyè chu lè ban dou mohyi. Nè- ouna nè- duvè, chè pindu a na hyotse…ha dou tokchin!

Le chakrichtin dremechê chu chè duvè j’oroyè chordè. L’è don la ponpa è lè ponpié ke chon arouvâ a chô! Parè ke Moncheu l’è j’ou du. I dyon ke l’arè motyatâ le pouro bedô.

Anne Marie Yerly