Drôlo d’afére tyè la mouda! L’é totavi moujâ ke lè j’omo dèvethran betâ na roba. Krêdè-vo pâ ke cheran prà pye a l’éje in kotiyon? Vo chédè ti kemin le Kréateu no j’a fabrekâ, adon pâ fôta dè vo j’in dre mé.

Lè Chinois dou viyo tin l’avan di robè, lè j’Arâbe beton di tsôthè lârdzè ke l’an le bèchi ke dèchin tantyè i dzènà , chin l’è le «arouel». I chon konfortâbyo. Adon k’ora, nouthrè j’omo chon charâ din di tsôthè èthrêtè, kemin fan-the, le vo dèmando?

Din le tin, lè bouébelè portâvan na roba tantyè ke chêyan poupro. On piti kradzè ke l’y avan djuchto betâ chè premirè tsôthè, inkontrè Moncheu ou velâdzo. Chi dêri vuthu in chotanna bin chure. «Yâ! (ke l’i fâ le piti mokèran): T’â adi la roba, tè?» L’inkourâ l’a bin ruju.

Kan no j’an keminhyi, no lè fiyètè, a betâ di tsôthè por alâ a l’èkoula, d’evê; è bin, la mouêna l’a fê bi! Pu ora l’i a pou-mé dè fèmalè ke beton di robè. Lè tin l’an tsandji.

Pu intrè no, ditè-mè vê, intye-vo, kô-l’è ke pouârtè lè tsôthè?

Anne Marie Yerly