Ti lè j’an, kan vin la fin dè fèvrê, le keminthèmin dè mâ è ke fâ bi tin, di budzon chè rèvèyon ou bè di dê è di j’atrè dè la mêtra dè méjon. L’è le gran momin di nètèyâdzo. Fô keminhyi pê vudji ti lè terin, lè boufè, parto yô l’i a ôtyè  a rèyi, pu dèbarachi chin ke l’i a dè tru.
L’i fô pachâ parto è fetchi chon nâ din totè lè kotsè. Chin oubyâ lè terin de la kemôde è totè lè kotsè dou tinyèmin.
Le gran dzoua l’è arouvâ! Fô betâ fro lè yi, lè matelâ, lè chomê è achebin lè bou dè yi por ôthâ la putha ke ch’è intètcha du la dêrire rèyuva. Po lavâ lè hyi è lè parê, i prin ha novala pata, la «pata mèrahyàja» ke l’a on mandzo ke chè prithè è ke virè dè totè pâ, l’è bin mi tyè la broche a rijèta.
La patrena keminthè pa le dèchu, è dèchin lè j’ètâdzo tantyè a la kâva è la buyandèri. Lè j’aranyè è totè lè chouârtè dè bèthotichè l’an tyè a bin lou tinyi.
Chon vejin dè payéche, che l’è pâ tru mô veri, l’i bayè on kou dè man po lè tâtsè pye pènâbyè: Rèbetâ in pyathe totè lè bougrèri, tablô è on tsiron dè pititè mârèri. Pu kan i keminthè tru a gravâ, chè muchè è ch’in va fére on toua yin de la putha.
La moralitâ dè to chin l’è bin galéja. L’omo âmè bin avê che n’intye-chè poupro, ma fô pâ tsanpâ le tsoupon tru yin. Madama, vo fô kan mimo pâ ithre tru brelindyàja.

Henri Niquille, Tsathi-chu-Monthêrvin