I dyon ke le bourdyè l’è le premi chunyo dou furi. Chi galé boytè y hyotsètè biantsè, tsantè le mi dè mé ache bin tyè lè mayintsètè ke l’an tsantâ dedzà.
L’è di botyè ruchtiko,chinchènâ. Chon tan bin inrachenâ ke, to por on kou, n’in d’a pyin le kurti. N’in tràvon achebin din lè dzà, ma adon, tronpâdè-vo pâ kan vo j’alâdè apri l‘ô di j’oua; lè foyè chon lè mimè ma le bourdyè l’è pojon. N’in konyecho ke ch’on j’ou atrapâ è le ke l’an fournê la dzornâ a l’èpetô.
Chi mo dè bourdyè, nyon châ du yô i vin; on bourdyè l’è achebin on brego, on dèvudjà, ma chuto, i bayon le non dè bourdyè a kôkon ke dèvejè prà è rido. Vo chédè prà: hou gajètè ke l’an totavi ôtyè a kontâ, è ke le fan tan rido… ke fô chè dèpatchi dè to oubyâ.
Ti hou galé botyè dou furi: lè pekôji, lè takounè, lè dzerohyàjè; lè grétê è lè pomê in hyà, to chi piti mondo hyori, yô tsanton lè j’oji è yô bordenon lè j’â… tyè dèmandâ dè pye po no j’èmèrvèyi.
Vo kouâjo a ti on bi mi dè mé.
Anne Marie Yerly