I dyon ke l’è on bi l’âdzo. L’âdzo dè la chapyinthe, l’âdzo yô y keminthon a bayi di bon konchêye. L’âdzo de l’èchpèryanthe. Ma adon, k’an y arouvon a mé dè chaptant’an, l’è le momin dè fithâ lè thinkant’an dè karyére. Di karyérè kemin ha dè chi ke l’a pâ fôta dè nonmâ… di karyérè dinche, ch’è dêvon ithre chèlèbrâyè kemin y fithè trèkondenâyè.
Moujâdè on bokon: thinkant’an a la titha dè vouéro dè tsantre è dè tsantèridè, in Grevire è tantyè ou payi dè Vô. L’i a in premi lè J’Armayi de la Grevire, ke l’an rèkordâ di lorié a travê le mondo; mè chovinyo dè Jacques Martin, din che n’èmichyon «Demindze-Martin», l’i ke n’in d’avi oyu dè totè chouârtè portan, è bin irè j’ou konpyètamin èkafoudi, èmêrvèyi d’intindre hou «piti Chuiche» ke tsantâvan kemin di j’andzè.
Di bi pri, di konpyumin, di bi voyâdzo, achurâ pâ chin pêna. Vouéro dè j’àrè a pyètenâ kemin on inmethâ dèvan chon pupitre? Vouéro dè batèmin dou kà è di bré… a rinda dè l’i léchi cha chindâ. On lordo patyè dè pahyinthe, dè talan, dè gougenètè è dè balè radzè! L’è chin, le chèkrè di gran j’artichte.
Michel, no tè kouâjin to dè bon. Le payi cherè a midzoua dèvan cha radiô; le kiosque a mujika tè farè fitha. Chindâ!

Anne Marie Yerly