No j’avan portan dèchidâ dè pâ dèvejâ dou tin, ma l’è mon kurti ke mè tsanpè a vo dre kemin le mondo l’è drôlamin fê. De na pâ dou mondo, lè dzin mouêron dè fan. L’an rin d’ivouè, rin dè lumiére. Hou ke l’ou j’a fayu ch’inchôvâ de la dyêra è di bonbè chon abandenâ a lou mimo; l’an léchi di mouâ din lè méjon in rinè è lè j’infan ke chon adi in ya l’an tyè-mé lè j’yè po pyorâ.
An-no adi le drê dè no pyindre por on tsôtin puri? Nouthrè boutekè chon adi pyênè dè to. L’è vré ke lè byâ l’an rèdzêrnâ, chin no j’inpatsè pâ, tank’ora, d’atsetâ de la kuchôla. Le kurti l’è pâ tan bi, ma no j’an di bi pre dè têra è di balè fanfiyoulè, le richto, ma fi… fudrè prindre chin ke vindrè.
No j’ôtro, no chin a chotha, yin di kontrèyondzè dou mondo, a l’èvri di bonbè. Chàbrin lè dou pi chu têra, è kemin dejê ma viye tanta: «Le Bon Dyu l’a fê le tin, pu l’a léchi kore.» Le fudrè prindre kemin i vin, chin rèmolâ.
Anne Marie Yerly

Restons raisonnables

Nous avions pourtant décidé de ne pas parler du temps, mais c’est mon jardin qui me pousse à vous dire comme le monde est drôlement fait. D’un côté du monde, les gens meurent de faim. Ils n’ont pas d’eau, pas de lumière. Ceux qui ont dû fuir la guerre et les bombes sont abandonnés à eux-mêmes; ils ont laissé des morts dans les maisons en ruines et les enfants qui sont encore en vie n’ont plus que les yeux pour pleurer.
Avons-nous le droit de nous plaindre, pour un été pourri? Nos magasins sont encore pleins de tout. C’est vrai que les blés ont germé sur le champs, ça ne nous empêche pas, jusqu’à maintenant, d’acheter de la cuchaule. Le jardin n’est pas très beau, mais nous avons de belles pommes de terre et de beaux haricots, le reste… ma fois il faudra prendre ce qui vient.
Nous autres, nous sommes à l’abri, loin des disputes du monde, à l’abri des bombes. Gardons les deux pieds sur terre, et comme disait ma vieille tante: «Le bon Dieu a fait le temps, puis l’a laissé aller!» Il faudra le prendre comme il vient, sans rouspéter.
Anne Marie Yerly