Maguy l’a na pachyon, lè tsa. Dza tota pitita irè todoulon apri, kemin na dona avu chè j’infan. To l’an, a la vèprâ, i dèchin in kontre la Lodzèta po n’in  nuri kotyè j’on. Chon ti di tsa charvâdzo, inpochubyo dè n’in prindre yon din lè man, è portan, ti lè dèvêlené, l’atindon po lou rèpé.
Pitita, la Maguy amâvè bin chè dèmorâ avui lè bouébo dou velâdzo è dè che n’âdzo. On patyotè l’avan dza pachâ pê la méjon, ma yon, èthê che n’amouryà: le Djan-Yôdo ou fakteu.
On kou ke chè dèmorâvan dèvan la jandêrmèri, chon kopin, le piti Djan-Yôdo, le pouro li… chè pâ chintu alâ. On châ pâ che l’avi medji di pràmè pâ màrè, ma to dzoua è-the ke l’a to léchi kore din chè tsôthè. Di tsôthè kourtè.To chin l’è dèchindu to bounamin tantyè a chè botè. Chè piti molè to vêrni, le piti irè pâ tan fyê.
Adon la Maguy, chin pêdre la titha, l’a fê a grapiyi chon martyan chu on ban, pu l’i a to bounamin rahyâ lè kuchè avu on butsiyon. Fô krêre ke l’amâvè fêrmo, chon Yodelè, por avê le korâdzo dè li bayi chta bala pràva d’amihyâ. N’in d’avê mimamin on bokon chu lè dê.
Du on pâr dè j’an, le Yôdo l’è a Ràma. Ti dou l’an adi, tantyè ou dzoua d’ora, vouêrdâ lou amihyâ d’infanthe.
Gérard Rime a Tônon. Tsêrmê