A duvè chenannè dè ha tsankramin bala fitha, ke no j’a rèdzoyi le kà, âmèré n’in rèmarhyâ ti lè j’organijateu, dèvan dè tru léchi rèvintâ on mache dè balè tsoujè ke no j’an yu è oyu, po nouthron pye grô pyéji.

To chin l’y è j’ou moujâ è betâ chu pi de la mèyà di fathon, chin ke chè chan léchi prindre pê la dèméjera, k’on konyè tru chovin ou dzoua d’ora. Mêrthi a vo ti dè chavê vouêrdâ lè pi chu toupa. No chin bin menâ!

Ouna manchyon partikuyire a vo lè pye dzouno, ma le pye chovin a di bon j’anhyan a la koma byantse è la bârba hyorya, a di fèmalè dèvouâyè, bin chure a la kouja dè nouthron patê ke no tin tan a kà.

A vo ti mêrthi d’avi bayi dè vouthron tin po lè patêjan ke no chin. Dyu vo bènechè!

L’y a ouna Dama ke l’a prà bayi, è du l’y a grantin, dè chon chavê è dè chon tin, è ke le fâ chure adi ti lè dzoua, po no j’ôtro lè patêjan. No l’i dêvin na fyêrta tsandêla. Rèmarhyin!

Mè chu lèvâ on matin. Din mon chondzo l’y avé trovâ on titre dè noubyèthe ke mè chinbyè li konvinyi fro delé bin. Ditè-mè chin ke vo j’in moujâdè? «Nouthra Dona di Patêjan!»

Portâdè-vo bin, è mè achebin.

Djan Gatsè, dou Prâ de l’Èchê.

Fête des patoisants - Dimanche 5 octobre

A deux semaines de cette si belle fête qui nous a réjoui le cœur, j’aimerais remercier tous les organisateurs, avant de laisse refroidir l’enthousiasme, pour toutes les belles choses que nous avons vues et entendues, pour notre plus grand plaisir.

Tout ceci fut bien pensé et mis sur pied de la meilleure des façons, sans que l’on se soit laissé prendre par la démesure. Démesure que l’on connait trop souvent aujourd’hui. Merci à vous tous de savoir garder les pieds sur la pelouse. Nous sommes bien menés!

Une mention particulière à vous les plus jeunes, mais le plus souvent à ces bons vieux à la crinière blanche et à la barbe fleurie, à des dames dévouées bien sur, à la cause de notre patois, ce patois qui nous tient tant à cœur.

A vous tous, merci de donner de votre temps pour les patoisants que nous sommes. Dieu vous bénisse!

Il y a une dame qui a beaucoup donné, et depuis longtemps, de son savoir et de son temps, et qui le fait certainement encore tous les jours, pour nous-autres patoisants. Nous lui devons une fière chandelle. Merci.

En me levant un matin. Dans mon rêve je lui ai trouvé un titre de noblesse qui me semble lui bien convenir. Dites-moi ce que vous en pensez: «Notre Dame des Patoisants!»

Portez-vous bien et moi aussi!

Jean Gachet du Pré de l’Essert