Demindze chu la loyèta; demikro a la katsèta. In kotyè j’àrè dè tin no j’an pachâ dou tsôtin a l’evê. La chenanna pachâye l’an fènâ dou rèkouâ, dou rèpé poutithre, è chi deminkro matin i nêvechê.

L’i a di j’âbro ke chon adi vê, di j’ôtro ke chon dza dèfoyi. Ou kurti, lè pyantè l’an krè prà pye rido ou mi d’oktôbre tyè dè tsôtin. Le tin l’è on bokon kemin le mondo, i va dè travê.

Ma, fô pâ ch’inpontâ. Vuityidè kontre la Din dè Bro, kemin lè dzà chon balè. L’otri, a l’àra yô le chèlà muchivè, i bayivè in kontre Hômata è lè Gachtè, lè vani l’avan totè lè kolà: bleu, dorâ, vyolè, on mêrvêyeu tablô.

Chtou dzoua, lè j’infan l’an lè vakanthè, y puon adi bin lou dèmodâ fro, chin chè dzalâ le nâ po le momin L’è tan galé dè lè j’intindre. Din nouthron kâro n’in d’a ouna vintanna, ch’intindon bin, i fan di ritè, i no fan kotyè kou di pititè fâchè, djuchto por rire. Adon no, po lè puni, no l’ou pouârtin kotyè pan d’ani, kotzyè bunyè, di brèchi. Hou piti richto dè bènichon fan lou bouneu. È hou galé j’infan, fan nouthron bouneu a no.

Anne Marie Yerly

Couleurs d’automne

Dimanche au balcon, mercredi au coin du feu. En quelques heures nous sommes passés de l’été à l’hiver. La semaine dernière on fanait du regain, des troisièmes peut être, et ce mercredi matin il neigeait.

Il y a des arbres encore verts, d’autres ont déjà perdu leurs feuilles. Au jardin, les plantes ont poussé bien plus vite en octobre qu’en été. Le temps est un peu comme le monde, il va de travers.

Mais, il ne faut pas s’emballer. Regardez vers la Dent de Broc, comme les forêts sont belles. L’autre jour, le soleil à son coucher, donnait contre la Hochmatt et les Gastlosen , les rochers étaient de toutes les couleurs, bleus, dorés, violets, un merveilleux tableau.

Ces jours, les enfants sont en vacances, ils peuvent encore bien s’amuser dehors, sans se geler le nez, pour le moment. C’est si joli de les entendre. Dans notre quartier il y en a une vingtaine, ils s’entendent bien, ils rient entre eux, ils nous font parfois de petites farces, pour rire, Alors nous, pour les punir, nous leurs apportons quelques pains d’anis, quelques beignets, des bricelets.

Ces petits restes de bénichon font leur bonheur. Et ces gentils enfants font notre bonheur à nous.

Anne Marie Yerly