To va tan rido ora, kan no j’an a pêna konprê na tsouja, fô dza ch’akothemâ a aprindre ôtyè d’ôtro, on fâ pâ-mé tan lè malin.

Pu kan on rèmârkè ke fô djij’an a on piti bolide, po chè pojâ chu na krouye pyênèta a chê miylâr dè kilomêtre dè nouthra têra, on ch’achin têrubyamin piti. Tyè van-the trovâ lé-hô? Poutithre ôtyè por alâ adi pye rido.

A propou dè vitèche, l’é trovâ, in rèbuyin din mè viyo papê, prà dè lètrè ke mè parin èkrijan, du la Franthe in Chuiche, è lè rèponchè dè Chuiche, l’i a dè chin mé dè chaptant’an. È bin, krêdè-mè krêdè-mè pâ, du Trivô tantyè vêr no, lè lètrè fajan dou dzoua! In pyêna dyêra! Nouthron velâdzo irè kan mimo a vint’è-thin kilomêtre dè Lyon. Djudjidè on bokon. L’avan pâ fôta dè lè j’invouyi ou ku dou dyâbyo po lè rèyi, lè rètornâ è lè dichtribuâ a l’indrê du yô iran modâ. Kemin i fan ou dzoua d’ora!

L’i a di tsoujè ke van tru rido, ma achebin de l’afére ke va tru pyan. Ègjinpyo: lè dèchijyon dè chêrtin gouêrnèmin.

Anne Marie Yerly

Trop pressés

Tout va si vite maintenant, quand on a à peine compris une chose, il faut déjà s’habituer à apprendre quelque chose d’autre, on ne fait plus trop les malins.

Et puis, lorsqu’on remarque qu’il faut dix ans a un petit bolide, pour se poser sur une mesquine petite planète, à six milliards de kilomètres de notre terre, on se sens terriblement petit. Que vont-ils trouver là-haut? Peut être quelque chose pour nous permettre d’aller encore plus vite.

A propos de vitesse, j’ai trouvé, en farfouillant dans mes vieux papiers, beaucoup de lettres que mes parents écrivaient de la France vers la Suisse, et les réponses de Suisse, il y a de cela plus de septante ans. Et bien, croyez-moi, croyez-moi pas, de Treyvaux jusque chez nous les lettres faisaient deux jours! En pleine guerre! Et notre village était encore à 25 km de Lyon. Jugez un peu. Il n’y avait pas besoin de les envoyer au diable vauvert pour les trier, les retourner et les distribuer à l’endroit d’où elles étaient parties. Comme ça se fait aujourd’hui!

Il y a des choses qui vont trop vite, mais aussi des affaires qui vont trop lentement. Exemple: les décisions de certains gouvernements.

Anne Marie Yerly