L’i a di dzin ke l’an mé dè tsanthe tyè di j’ôtro. Ouna gota dè tru, t’è fan chohyâ din le kornè è tè beton a l’amanda; on fu rodzo oubyâ t’è kothè ouna galéja thantanna dè fran, che l’è pâ mé. Po pou d’afére t’i on kriminèl!

Vo chédè, du l’i a grantin ke la Lê l’è kemin na deléje ou mitin dou tsemin: Lè piti pâchon par dèjo, lè grô par dèchu… l’i a tyè lè tâko ke van borâ kontre.

I konyecho kôkon ke l’a fê ôtramin, l’a korbâ la Lê chin le chavê, inpunèmin. On matin dè fèvrê, chè rindu konto ke l’avi adi pâ atsetâ la venyèta po l’otoroute. «Raoudzê, l’é j’ou greda. Mè fô to tsô min d’alâ apri ouna a la pouchta.» Ke chè di la koupâbya.

Ou momin dè gratâ yin la viye venyèta, chè rindu konto k’irè ha dè dou mile trèdzè… Dè to l’an katouârdzè, nyon l’a rin yu… è chuto pâ lè jandârme.

N’in d’a kan mimo pâ atsetâ duvè por apéji cha konhyinthe.

Anne Marie Yerly

A la barbe du gendarme

Il y a des gens qui ont plus de chance que d’autres. Une goutte de trop: ils te font souffler dans le cornet et te mettent à l’amende; un feu rouge oublié te coûte une jolie centaine de francs, si ce n’est plus. Pour peu de chose, tu es un criminel.

Vous savez depuis longtemps que la Loi est comme une barrière au milieu du chemin: les petits passent dessous, les gros dessus, il n’y a que les imbéciles qui vont bourrer contre.

Je connais quelqu’un qui a fait autrement, elle a courbé la Loi sans le savoir, impunément. Un matin de février, elle s’est rendu compte qu’elle n’avait pas acheté la vignette d’autoroute. «Sapristi, j’ai eu de la chance. Je vais tout de suite aller en chercher une à la poste». Que se dit la coupable.

Au moment de gratter l’ancienne vignette, elle s’est rendu compte que c’était celle de 2013… de toute l’année 2014, personne ne s’en est aperçu... et surtout pas les gendarmes.

Elle n’en n’a quand même pas acheté deux pour apaiser sa conscience.

Anne Marie Yerly