Ora ke le premi dè mé aproutsè, lè mayintsè ch’inkotson a bin chavê lè tsan ke dêvon rèdzoyi lè dzin dè méjon in méjon. Din mon velâdzo, a Machin, chtou j’an pachâ, no j’an chovin oyu di tsan in patê ke le réjan Monnard aprinyê i j’infan dè cha klache. Fô èchpérâ ke la lethon chi ratinyête.

Din chi mimo velâdzo, din lè j’an karant’ è ôtyè, no keminthivan è fournechan totèvi l’ékoula pa na prèyire è achebin on tsan. On fyê tro dè «L’Ecolier chanteur» irè pachâ in rèyuva è chin bayivè di bi tsan po le premi dè mé. Mè chovinyo k’on n’an l’avi tsantâ «Le bouébo dè tsalè». A la piathe di thin chantimè l’avé chovin rèchu on piti bokon dèplye. Avu nouthron réjan no j’avan achebin aprê «Lè j’armayi di Kolonbètè». Ou bè dè kotyè tin, a la pyathe dè tsantâ «lyôba», no j’an keminthi a dre «chôba». Adon lè j’ou fournê, na j’an djamé rètsantâ chi bi tsan, nouthron réjan avi a nom Chobaz.

Bin di j’an pye tâ, no j’an jou la tsanthe a Machin dè rèintindre «Lè j’armayi di Kolonbètè», kan Bernard Remanin lyè jou rèyi kemin soliste a la Fitha di Vigneron dè mil-nouthin chaptantè chate. Dèvan la fitha, po ch’intrinâ, chê tignê chu lè jègrâ dè lou méjon dotchya chu le hô. Chè lyôba rèthrenâvan tantyè ou velâdzo. Irè on vretâbyo bouneu é no chin pâ prè dè l’oubyâ. Lè j’an l’an pachâ mâ kan no j’an l’èpâhyo dè le rèintindre chu lè j’ondè, cha bala vouê no fâ adi la pi d’ouye.

Vonvon Kolly

 Les petits chanteurs du 1er mai sont de retour 

Maintenant que le 1er mai approche, les petits chanteurs se préparent à bien savoir les chants qui doivent réjouir les gens de maison en maison. Dans mon village, à Marsens, ces années passées, on a souvent entendu des chants en patois que le régent Monnard apprenaient à sa classe. Il faut espérer que la leçon soit retenue.

Dans ce même village, dans les années quarante et quelque chose, on commençait et finissait toujours l’école par une prière et aussi un chant. Un bon bout de «L’Ecolier chanteur» était passé en revue et cela donnait des beaux chants pour le 1er mai. Je me souviens qu’une année j’avais chanté «Le garçon de chalet». A la place des 5 centimes, j’avais reçu un petit peu plus. Avec notre régent, on avait aussi appris «Les armaillis des Colombettes». Au bout de quelque temps, à la place de chanter «lyôba», on a commencé à dire «chôba». Alors, ça été fini, on n’a jamais plus rechanté ce beau chant, notre régent s’appelait Chobaz.

Bien des années plus tard, on a eu la chance à Marsens de réentendre «Les armaillis des Colombettes», quand Bernard Romanens a été choisi comme soliste à la Fête des Vignerons de 1977. Avant la fête, pour s’entraîner, il se tenait sur les escaliers de leur maison perchée sur le haut. Ses «lyôba» résonnaient jusqu’au village. C’était un véritable bonheur et on n’est pas prêt de l’oublier. Les années ont passé, mais quand on a l’occasion de le réentendre sur les ondes, sa belle voix nous fait encore la chair de poule.

Vonvon Kolly