N’in d‘a poutithre adi dè hou ke ch’in chovinyon. Irè a Loutsêrna, ou mi dè chaptanbre thinkant’è katro, irè l’Echpojichyon de la Payjanèri Chuiche. Nouthon tyinton irè farmo bin rèprèjintâ. Di balè vatsè, di j’armayi, di tyivrè, chin oubyâ le bon fremâdzo dè Grevire.
Ma adon, vo chédè ke lè Fribordzê chè prèjinton djamé chin tsantâ è youtsèyi. Dzouno è min dzouno l’avan inkotyi di bi tsan è mimamin di danthè. No l’i chin jelâ dou kou, le deminkro è la demindze. Lè Tsêrdziniolè, di dzin di j’Èkathê, dè Vôru, dè la Rotse, ache bon tsantre lè j’on tyè lè j’ôtro. Mè chovinyo dou piti Roland Tinguely (l’avi trèdze an) ke tsantâvè a pyêna vouê: «Du chti furi, chu poyi po bouébo dè tsalè… dè Dzojè a Marc» n’in d’é adi la pi d’ouye.
No j’avan fê le voyâdzo in kàr. On viyo takô di GFM. Pê bouneu, irè pochubyo d’ourâ lè fenithrè. Pâ tan akothemâ a voyadji, din chi tin, prà dè nouthrè j’omo, portan grô è bi, ma on bokon avenâ… l’an j’ou dou mô dè chuportâ lè rèchoutâyè dou kàr. To por on kou, n’in d’a yon ke l’a djuchto pu ch’abadâ, tindre le kou avô la fenithra… è rèmètre chon bon goutâ tru bin arojâ. Ma, in mimo tin, lè fôthè-din l’avan chuêvu la pinta. Paf, chu la route.
L’an arèthâ le konvoua, è l’ôtro a la korcha apri chon rathali: «L’a rin dè mô!» ke no kriyè! Tan mi. Ma, l’oto k’arouvâvè in mimo tin, l’a pâ mankâ. Rin-mé dè din por arouvâ a la méjon.
Anne Marie Yerly
A l'Expositon 1954
Il y en a peut être encore qui s’en souviennent. C’était à Lucerne, au mois de septembre 1954,l’Exposition agricole Suisse. Notre canton y était fort bien représenté. De belles vaches, des armaillis, des chèvres, sans oublier le bon Gruyère.
Mais alors, vous savez que les Fribourgeois ne se présentent jamais sans chanter et youtser. Jeunes et moins jeunes avaient préparé de beaux chants et mêmes des danses. Nous y sommes allés deux fois, le mercredi et le dimanche. Les Tsêrdziniolè, des gens des Ecassey, de Vaulruz, de La Roche, aussi bons chanteurs les uns que les autres. Je me souviens du petit Roland Tinguely (il avait treize ans) qui chantait à pleine voix Le Bouébo, de Joseph à Marc… j’en ai encore la chair de poule.
Nous avions fait le voyage en car. Un vieux tacot des GFM. Heureusement, il était possible d’ouvrir les fenêtres. Pas très habitués à voyager dans ce temps-là, quelques-uns de nos messieurs, pourtant gros et beaux, mais un peu avinés… ont eu du mal de supporter les soubresauts du car. Tout à coup, l’un d’entre eux a juste réussi à se lever, tendre le cou à la fenêtre… et rendre son bon dîner trop bien arrosé. Mais, en même temps, son dentier avait suivi la pente. Paf, sur la route.
On arrêta le convoi, et l’autre à la course va ramasser son râtelier: «Il n’a pas de mal!» nous crie-t-il. Tant mieux! Mais l’auto qui arrivait en même temps, ne l’a pas raté. Plus de dents pour arriver à la maison.
Anne Marie Yerly