Ou Prâ de l’Èchê, dechando pachâ, na bala fitha no j’an j’à. Ouna mècha bin tsantâye, a la tsapala dè Chin Garin ke chè betâye chu chon trin’yon. Le tê lè jou rèfê chti tsotin. Bravô a l’âchiyâre, dou tréto bi travô.

Portyè na mècha lé d’amon? L’idé irè din l’ê du l’y a grantin, dè fére on rathinbyèmin dè ti lè dèchindin dè nouthrè gran-parin k’èthan arouvâ lé d’amon le furi dè djije nou-thin dji j’è nà, avu lou famiye. Iran vinyê du Prindji: chi frârè è trè chèrè. Lucie, dza mariâye, l’è pâ montâye. Madeleine lè mouârta otyè dèvan. Chin fâ ke l’y aré d’abôr than t’an ke lè Gatsè chon in Tsêrmê.

L’idé dè fére na fitha l’è rèvinyête chu le tapi a l’okajyon d’on’intêrèmin. Dutrè dzouno chè chon tot’a l’àra chintu pouchâ di j’âlè. L’ou j’avé de: n’atindè pâ tru, arouvo a vouètant’an,âmèré bin fére partya dè la fitha.

Inke l’è pachâye, è bin pachâye nouthra fitha! Prà dè dzouyo, prà dè chovinyi, ouna bouna fathon dè chè rètrovâ intrè koujin, koujenè, d’aprindre a konyèthre prà dè dzouno dè duvè, kan l’è pâ trè jènèrachyon.

Vo j’é dèvejâ dè chovinyi. Bin chure ke chon pâ ti jou bon. Hou ke chon arouvâ ink’amon l’an konyu la granta pouta krije di j’an trinta. L’an fê mé tyè lou drê dè dzoua dè chêrvucho i frontêrè. No j’ôtro no j’an jà la mètsanthe dè pêdre nouthron chènya adon ke le dodjimo piti frârè n’irè pâ ou mondo, ma no j’avan na dona kemin n’in fan rin mé.

Ma la ya irè dinche po to le mondo. Vouêrdin in titha lè mèyou momin, tot’in chatsin rèkonyèthre ke din chti mondo no chin di favorijâ.

Ou non dè tota nouthra granta famiye, l’é na mache dè dzin a rèmarhyâ: Moncheu l’abbé Guy Oberson, lè tsantà è lou dirèkteu, mon piti koujin «Colin» Bussard po chin ke chè bayi la pêna dè no j’adrèhyi kotyè mo bin chintu, è totafé a propou. A Vincent, a Gisèle, mèrthi on milyon dè yâdzo po lou j’idé a la konchèpchyon, a l’organijachyon, la dèkorachyon. On vayin kou dè tsèpi a Margot, a Francis, a Marcel, a ti hou, konyu ou pâke l’an bayi di kou dè man po ke la fitha chi bala. È l’è jou na rèuchête chu tota la linye. Forrrmidable!

On piti mo a ti hou ke l’aran pu vinyi, è ke l’an pâ fê. Vo chédè pâ chin ke vo j’i pêrdu. Ma to lè pâ fotu.Vo vindrê le kou ke vin?

Djan dou Prâ de l’Èchê

Une belle fête au Pré-de-l’Essert

Au Pré-de-l’Essert, samedi dernier, quelle belle fête nous avons eue. Une messe bien chantée, à la chapelle St-Garin qui s’était mise sur son trente et un. Le toit fut réparé cet été. Bravo au tavillonneur, du très beau travail.

Pourquoi une messe là-haut? L’idée était dans l’air depuis longtemps, de faire un rassemblement de tous les descendants de nos grands-parents qui étaient arrivés là-haut au printemps 1919, avec leur famille. Ils venaient de Pringy: six frères et trois sœurs. Lucie, déjà mariée n’est pas montée. Madeleine étant morte peu avant.

Ce qui fait qu’il y aura bientôt cent ans que les Gachet sont à Charmey. L’idée de faire une fête est revenue sur le tapis à l’occasion d’un enterrement. Deux ou trois jeunes se sont aussitôt senti pousser des ailes. Je leur avais dit: «N’attendez pas trop, j’arrive à 80 ans, j’aimerais bien faire partie de la fête!»

La voici passée, et bien passée, notre fête! Beaucoup de joie, de souvenirs, une bonne façon de se retrouver entre cousins et cousines; d’apprendre à connaître les jeunes, de deux, quand ce n’est pas de trois générations.

Je vous ai parlé de souvenirs. Bien sur qu’ils ne furent pas tous bons. Ceux qui sont arrivés ici, en haut, not connu la grosse et vilaine crise des années trente. Ils ont fait plus que leur droit de jours de service aux frontières. Nous, nous avons eu le malheur de perdre notre père, alors que le douzième petit frère n’était pas encore au monde. Mais nous avions une maman comme on en fait plus. Mais la vie était ainsi pour tout le monde. Gardons en tête les meilleurs moments, tout en sachant reconnaître que dans ce monde, nous sommes favorisés.

Au nom de toute notre grande famille, j’ai une quantité de monde à remercier: Mr l’abbé Guy Oberson, les chanteurs, leur directeur mon petit cousin «Colin» Bussard, qui s’est donné la peine de nous adresser quelques paroles bien senties et tout à fait à propos. A Vincent, à Gisèle, merci un million de fois pour leurs bonnes idées dans l’organisation, la décoration. Un vaillant coup de chapeau à Margot, à Francis, à Marcel, à tous ceux, connus ou non, qui ont donné des coups de main pour que la fête soit belle. Ce fut une réussite sur toute la ligne. Forrrrmidable!

Un petit mot à tous ceux qui auraient pu venir et qui ne l’ont pas fait: «Vous ne savez pas ce que vous avez manqué. Mais, tout n’est pas fichu. Viendrez-vous la prochaine fois?

Jean Gachet