Kan on vê ti lè dzoua lè tèrubyè j’èmâdzè dè hou dzin ke ch’èchkanon dè lou payi in djêra, è kan on a le kà a la bouna pyathe, on chè di ke l’è pâ pochubyo dè rin fére. Din nouthron payi, kemin din prà dè j’ôtro in Europe, on tràvè di thantre po lè l’èbèrdji, ma apri fô trôvâ a lè lodji. Ma din nouthron mondo yô lè dzin chon chovin tsakon po chè, li ya prà ke dyon ke hou rèfujiyi fô lè rinvouyi din lou payi.
Li ya dè chin mé dè trint’an, din mon velâdzo dè Machin, no j’an trovâ a lodji ouna famiye dè Cambodgiens, k’èthan di « boat people ». No j’èthan kotiè dzin d’la kemouna, chu la boun’ idé de la châdze-fêna Remy, po prèparâ l’arouvâye dè ha famiye dè cha j’infan avu lè parin è ouna tanta.
No j’an trovâ la méjon a Chidoni, k’èthi badêre, ma ke l’avé fôta d’on kou dè nà. Ha méjon lyè jou nètèya pa lè dzouno dou velâdzo è rèparâye pa lè dzin dè mihi dè l’èpetô, propriyètéro di yu. No j’an trovâ din le velâdzo di màbyo, di j’âyon, dè tyè a medji è di dèmori po lé j’infan. Di mére dè famiye chè chon anonhyi po aprindre le franché i j’infan è lè j’idyi a fére lou dèvê d’ékoula. A l’âra k’lè, lè parin, ke l’avan trovâ dou travô a l’èpetô, chon adi inke è lè j’infan chè chon bin débrouyi è chon naturalijâ dè Machin.
In pachin, i bayo on fyê kou dè tsapi ou prèfè d’la Grevîre ke la bayi l’otorijachyon d’ourâ lè pouârtè a di rèfujiyi din on tsathi a Grolley.

Vonvon Kolly

Au secours des réfugiés

Quand on voit tous les jours les terribles images de ces gens qui fuient leur pays en guerre, et qu’on a le cœur à la bonne place, on se dit que ce n’est pas possible de ne rien faire. Dans notre pays, comme dans beaucoup d’autres en Europe, on trouve des centres pour les héberger, mais après il faut trouver à les loger. Dans notre monde où les gens sont souvent chacun pour soi,  beaucoup disent que ces réfugiés, il faut les renvoyer dans leur pays.
Il y a de ça plus de trente ans, dans mon village de Marsens, on a trouvé à loger des Cambodgiens qui étaient des «boat people». Nous étions quelques personnes de la commune, sur la bonne idée de la sage-femme Remy, pour préparer l’arrivée de cette famille de six enfants avec les parents et une tante.
On a trouvé la maison de Sidonie qui était libre, mais qui avait besoin d’un coup de neuf. Cette maison a été nettoyée par les jeunes du village et réparée par les artisans de l’hôpital, propriétaire des lieux. On a trouvé dans le village des meubles, des habits et des jouets pour les enfants. Des mères de famille se sont annoncées pour apprendre le français aux enfants et les aider à faire leurs devoirs d’école. A l’heure actuelle, les parents qui avaient trouvé du travail à l’hôpital, sont encore là et les enfants se sont bien débrouillés et sont naturalisés, de Marsens.
En passant, je donne un bon coup de chapeau au préfet de la Gruyère qui a donné l’autorisation d’ouvrir les portes à des réfugiés dans un château à Grolley.

Vonvon Kolly