Din na gajèta, l’é yê on’artikle k’irè titrâ dinche: «Patherâ è avê pètâ!» L’ôteu betâvè chu le tapi to chin ke nouthrè brâvè è balè vatsè dêvon chuportâ vouè.

Po keminhyi, l’i a dza prà dè j’an ke hou «damejalè» l’an pâ-mé l’èpâhyo dè fére kotyè katsevindon alintoua de la méjon, in galanta konpanyi. Ou dzoua d’ora, l’è di krâno moncheu, in blouje byantse, ke vinyon, chin dèlikatèthe, achurâ la dèchindinthe dou tropi. La natura l’a rin-mé a dre. Damâdzo.

I dyon portan ke din chuvin payi, d’apri chin ke no di l’ichtouâre, le bà rèprèjintè la fouârthe, la fèkonditâ è l’abondanthe. No j’in d’an on fameu l’ègjinpyo chu la pyêthe de la gâre a Bulo.

«Pourè bithè! Vo chufi pâ dithre mégrè kemin di vèlo, ora vo tréjon lè kouârnè… vo j’ê rin-mé dè prèchtanthe.»

Di dzin ke l’an dèchidâ dè vivre a la kanpanye, chupouârton pâ vouthrè chenayè è hyotsètè. L’ou grâvon dè dremi, l’avan tyè chobrâ in vela, i dyon ke l’i a rin dè chèta.

Mé tyè chin, di chavin, ou non de la «rètsoudâye klimatike» van èprovâ dè l’ou trukâ la pathera, to chin po l’ou j’ ôthâ on dêri pyéji: pètâ alêgramin è rotâ avu tsêrmo, tot’in troupin dzoyàjamin la boun’êrba dè nouthra Grevire.

Gérard Rime a Tônon. Tsermê

Pauvres vaches

Dans un journal, j’ai lu hier un article intitulé: «Pâturer et avoir pété!» L’auteur mettait sur le tapis tout ce que nos braves et belles vaches doivent supporter aujourd’hui.

Pour commencer, il y a déjà bien des années que ces demoiselles n’ont plus l’occasion de folâtrer autour de la maison en galante compagnie. Aujourd’hui, ce sont de sérieux messieurs en blouse blanche, qui viennent, sans délicatesse, assurer la descendance du troupeau. La nature n’a plus rien à dire. Dommage.

L’histoire nous dit pourtant que dans certains pays, le taureau représente la force, la fécondité et l’abondance. Nous en avons d’ailleurs un fameux exemple sur la place de la gare de Bulle.

«Pauvres bêtes. Il ne vous suffit pas d’être maigres comme des vélos, on vous enlève maintenant les cornes, vous n’avez plus aucune prestance.»

Des gens, qui ont décidé de vivre à la campagne, ne supportent pas vos sonnailles et clochettes. Elles les empêchent de dormir, paraît-t-il, ils n’avaient qu’à rester en ville, on dit qu’il n’y a pas de bruit!

Encore plus des «savants» au nom du réchauffement climatique, vont essayer de truquer les fourrages, tout ça pour leur ôter un dernier plaisir: Péter allègrement et roter avec charme, tout en foulant joyeusement la bonne herbe de notre Gruyère!

Gérard Rime à Tonon. Charmey