Chu a non Turlupa, galéja vatsèta tchaka-nêre avu dou tro dè kouârnè gugin dè tsatchyè pâ dè la titha. Du furi tanty’a l’outon, mè chu rèvondâ ou mitin dou prâ de la Toula, a l’intrâye dè Bulo.

La viya fêrma ke m’achothâvè, l’è la dêrire in vela dè Bulo. Chti l’an l’é j’ou on grô pyéji dè pachâ on têrmo dè ma ya vê-li, bèniràja d’avê bin prà dè kuriyojitâ a gugâ. Ou mi dè mé, la brijon di chenayè d’on tropi ke poyivè m’achintyenâvè lè j’oroyè. Lè dedzà dè tsôtin, totè chouârtè dè dzin kanbinin vê le martchi folklorike, di j’infan koratin de ché de lé, di donè tsanpin lou pouchatè. Le dechando du la mi-né tantyè ou tsan dou pu, l’èthê la tanbornâye dè dutrè kenoyon tyè d’avê tru tourdji le popalè, chè ramachâvan dè biga in kontin di chindzèri a chè tapâ le ku bâ. Ma to chin l’a veri kan…

Di troyon vinyin de na grôcha vela avu di bèrôtè règordjintè d’ardzin, l’an atsetâ chi kâro dè toupa mé dè mile fran le mêtre. Adon, to le tsôtin mè chu rèvondâ dè cht’êrba dè retso, l’èthê kemin ch’alâvo ti lè dzoua mè gouèrnâ a «La Tour d’Argent», vo lécho èvaluâ la vayà dè ma bàja. Du tin j’in tin fayê kan mimo mè mèfyâ, pêrmô ke môgrâ le mohyi a rinda, de la pâ de la route i dègotâvo chovin di j’afére rin tru katolike a medji ke l’aran pu mè fotre la dètraka.

Lâ-ouê! Ha chéjon l’è j’ou ma dêrire pê Bulo, hou lâdro van mè fotre fro du inke. Lè j’an ke vinyon, chàbrèri a la kanpanye. Ô! L’i cheri rin mô, pori gugâ pachâ le trin, poutithre cheri na chenayire. Chin ke mè turlupinè… l’è ke a Bulo l’an dyora rin d’êrba. Adon vouè, l’è grantin ke dyécho a la kemouna: «Bayidè vo achyin! Le bà dou gonfanon porê bin vinyi ache chètson tyè chon frârè de la gâre.»

Bernard Channey

L’histoire de Tulipe

On m’appelle Tulipe, jolie petite vache tachetée noire, avec deux bouts de cornes guignant de chaque coté de ma tête. Du printemps à l’automne, je me suis régalée au milieu du pré de la Toula, à l’entrée de Bulle.

La vieille ferme qui m’abritait, est la dernière en ville de Bulle. Cette année j'ai eu grand plaisir de passer une partie de ma vie auprès d’elle; contente d’avoir pas mal de curiosités à observer. Au mois de mai, la rumeur des sonnailles d’un troupeau qui alpait, me caressait les oreilles. Les jeudis d’été, toutes sortes de gens cheminaient vers le marché folklorique, des enfants courant de ci delà, des mamans poussant leur poussette. Le samedi, de minuit jusqu’au chant du coq, c’était le bruit de tonnerre de deux ou trois vauriens, qui, d’avoir siroté un peu trop, se trimbalaient en zigzag, se racontant des singeries… à se taper le cul par terre. Mais, tout cela a tourné quand…

Des messieurs prétentieux venant d’une grande ville, avec des charrettes regorgeant d’argent, ont acheté ce carré de verdure… à plus de 1000 fr. le mètre. Alors, tout l’été je me suis rassasiée de cette herbe de riches, c’était comme si j’allais tous les jours manger à «La Tour d'Argent». je vous laisse évaluer la valeur de ma bouse. De temps en temps je devais quand même me méfier, car malgré l’église toute proche, de ce coté de la route, je trouvais souvent des choses pas trop catholiques à manger. Tout cela aurait bien pu me ficher la détraque.

Hélas-oui! Cette saison fut ma dernière à Bulle. Ces ladres vont me flanquer hors d’ici. Ces années prochaines, je resterai à la campagne. Ô je n’y serai pas mal, je pourrai voir passer le train. Peut être même que je porterai une sonnaille. Ce qui me turlupine… c’est qu’à Bulle, ils n’ont bientôt plus d’herbe. Alors aujourd’hui, il est grand temps que je dise à la commune: «Faites attention! Le taureau de votre drapeau pourrait bien devenir aussi sec et maigre que son frère de la place de la gare.»

Bernard Channey