Ou dzoua d’ora, po to chavê è ithre a l’aproutse dè to le mondo, tsakon l’a din cha fata on portâbyo. I rin tarubyamin charvucho è on chè dèmandé kemin on fajê dèvan. Ma chi bi dèmori fô chavê li hyoure le bè dè tin j’in tin. Dariremin, l’é bin ruju kan lyé yu mon kopin Firmin fêrmo mô prê dou tin d’la mècha i kapuchin a Bulo. Ha monètyâ dè portâbyo chè betâ a chubyâ in pyin «Gloria».

Kan iro dzouno, m’è rapalo ke ly avê pâ tan dè tèlèfone din le velâdzo. In mil-nou-thin chouchantè-trè, ouna demindze né, poutamin frêde de dèthanbre, ly avê le fu ou dèchu dè Machin. On kou alarmâ, mè chu vuto rindu konto ke fayi dèmandâ dè l’éde. Vêr no, no j’avan tyè ouna ponpa a bré. Ou pye pri dou lokal dou fu chu j’ou vê Léontine po tèlèfonâ a Mathieu dè Tsèrlin, po vinyi a nouthron chèkouâ avu la ponpa a moteu. In arouvin ou pouêrtso, Léontine mè brâmè: «Ma te pou pâ tèlèfonâ, le tèlèfone l’è dzalâ!» Ma fayu kor on fyê tro yin po trovâ on tèlèfone «rètsoudâ».

Ou dzoua d’ora no j’an la tsanthe d’ithre bin mi inparâ kontre le fu. Lè ponpyé chon bin prèparâ pa di dzin dè rèthèta è l’an to chin ke fô po bin fére lou travô.

Vonvon Kolly

Le téléphone au jour d’aujourd’hui

Au jour d’aujourd’hui, pour tout savoir et être à l’approche de tout le monde, chacun a dans sa poche un portable. Il rend terriblement service et on se demande comment on faisait avant. Mais ce jouet il faut savoir lui couper le bec de temps en temps. Dernièrement, j’ai bien ri quand j’ai vu mon copain Firmin très mal pris pendant la messe aux capucins, à Bulle. Cet encombrant portable s’est mis à sonner pendant le «Gloria».

Quand j’étais jeune, je me rappelle qu’il y avait très peu de téléphones au village. En mil-neuf-cent-soixante-trois, un dimanche soir terriblement froid de décembre, il y avait le feu au-dessus de Marsens. Une fois alarmé, je me suis très vite rendu compte qu’il fallait demander de l’aide. Chez nous, on n’avait qu’une pompe à bras. Au plus près du local du feu, j’ai été chez Léontine pour téléphoner à Mathieu d’Echarlens, pour venir à notre secours avec la pompe à moteur. En arrivant au corridor, Léontine me crie: «Mais tu ne peux pas téléphoner, le téléphone est gelé!» Il m’a fallu courir un peu plus loin pour trouver un téléphone réchauffé.

Au jour d’aujourd’hui, on a la chance d’être mieux protégé contre le feu. Les pompiers sont préparés par des gens compétents et ils ont tout ce qu’il faut pour bien faire leur travail.

Vonvon Kolly