Lè chavan fan di rètsêrtsè chu to chin ke pou ègjichtâ chu têra. I tràvon bal-è-bin d’afére. Utilè chovin. Di machinè po fachilitâ le travô din lè fabrekè, a la kanpanye è din le minâdzo. È chuto di rèmêdo dè kalitâ.

Ma adon, vo j’i prou chure yu kemin mè, din lè papê, chin ke l’an invintâ po no j’ôtro, lè viyo: Ouna pachtiye po vivre tantyè a than-vint’an! Kan on è dza pou è dètêna a thinkant’an, Diu châ a than-vin?

Nekoué l’a invide dè vivre tan grantin? Moujâdè on bokon; kan on vê vouéro dè pouro viyo, malâdo, ou fon d’on yi, di j’an dè tin. Ke chon pâ-mé a là è ke l’an panyi la parola po dèmandâ la mouâ. Fudrè-the adi lè tsanpâ in’an dinche, tantyè a than vint’an? Na.

Ouna dama èkrivin dejê: «Muri dzouno ma le pye tâ pochubio!» Chin vou a dre: chobrâ dzouno d’èchpri, in chindâ, pu ch’indalâ din la dinyitâ… kan vindrè le momin. La natura l’è dinche fête, l’outon lè foyè tsijon po nuri la têra, le furi lè pyantè krèchon, l’è ouna novala ya. Po no j’ôtro, l’è parê.

N’in vu rin dè hou pachtiyè. Vo dèvethrê chuportâ mon Deché Delé onko ou mintè mé dè karant’an dè tin. Vu toparê pâ vo j’inpojâ chin.

Anne Marie Yerly

Vivre longtemps

Les savants font des recherches sur tout ce qui peut exister sur terre. Ils trouvent beaucoup de choses. Utiles souvent. Des machines pour faciliter le travail en usine, à la campagne et dans le ménage. Et surtout des médicaments de qualité.

Mais alors, vous avez sûrement comme moi, vu dans les journaux, ce qu’ils ont inventé pour nous autres les vieux: une pilule pour vivre jusqu’à 120 ans!

Qui a envie de vivre si longtemps? Pensez un peu; lorsque l’on voit combien de pauvres vieux, malades, au fond d’un lit pendant des années qui n’ont plus de raison, et qui n’ont même plus la parole pour demander la mort. Faudrait-il encore les pousser jusqu’à 120 ans? Non.

Une dame, écrivain disait: «Mourir jeune mais le plus tard possible!» Ce qui veut dire rester jeune d’esprit, en bonne santé et s’en aller dans la dignité… quand viendra le moment. La nature est ainsi faite, en automne les feuilles tombent pour nourrir la terre, au printemps les plantes grandissent, c’est une nouvelle vie. Pour nous autres c’est pareil.

Je n’en veux pas, de ces pilules. Vous devriez supporter mon deché delé , encore au moins plus de 40 ans. Je ne veux tout de même pas vous imposer ça!

Anne Marie Yerly