I dèginyè dyora dè yêre lè gajètè, d’akutâ lè novalè, por aprindre ti lè mâlà dou mondo. Lè dyêrè fan radze chu n’a grôch’inpartya dè la pyanèta. Yô l’an rin dè dyêra, i arouvon kan mimo a lou tsêrkotâ po de l’afére dè rin. Din prà dè minâdzo l’è parê; pâ fôta dè vo j’èchplikâ!

Ti hou dzouno ke ch’ingadzon por alâ dyêrèyi… vo chédè yô; ou non dè tyin dyu? È-the rintyè po le pyéji dè tyâ? On chè dèmandè. Tyè ke chè pâchè din la titha dè hou dzin?

In dèpye dè chin, achtou ke l’i a kôkon ke pâchè pê la djuchtiche, tsakon fâ chè komantéro. L’akujâ dê ithre dèfindu, môgrâ la gravitâ dè chè krimo. L’è pâ in fajin di konto ke chin vou tsandji ôtyè.

Mè, chovin i moujo, avu pidji, i donè dè hou kriminèle. L’an betâ ou mondo on galé piti, l’an alèvâ ou pye pri dè l’ou bon kà.To por on kou le dzouno i tsê, bin bâ. Lè dzin dèvejon, batayon. La dona, le chènia i pyàron. Betin-no a lou pyathe.

Anne Marie Yerly

Le monde à l’envers

On est dégouté de lire les journaux, d’écouter les nouvelles pour apprendre tous les malheurs du monde. Les guerres font rage sur une grande partie de la planète. Où il n’y a pas de guerre, ont arrive tout de même à se chamailler pour peu de chose. Dans bien des ménages c’est pareil; pas besoin de vous expliquer.

Tous ces jeunes gens qui s’engagent pour aller guerroyer… vous savez où; au nom de quel dieu? Est-ce seulement pour le plaisir de tuer? On se demande. Que se passe-t-il dans la tête de ces gens?

En plus de cela, aussitôt qu’il y a quelqu’un qui passe devant la justice, chacun y va de ses commentaires. L’accusé doit être défendu, malgré la gravité de ses crimes. Ce n’est pas en «faisant des contes» que cela va changer quelque chose.

Moi, souvent je pense, avec pitié, aux mamans de ces criminels. Elles ont mis au monde un gentil petit, elles l’ont élevé au plus près de leur bon cœur. Soudain, le jeune tombe, bien bas. Les gens bavardent, bataillent. La mère, le père pleurent. Mettons-nous à leur place.

Anne Marie Yerly