L’è le furi, lè dzin l’an invide dè fére le grô minâdzo. Din le mondo, du l’i a kotyè dzoua… i fan parê. Lè papê no choulon dè novalè lè pye krouyè. Vo m’i konprê: lè novi chkandale finanhyi.

Di grô bounè, dè totè lè kolà, ch’è fan yètâ: l’an pâ betâ ti lou j’à din le mimo panê! L’ardzin nê, le beton din le panê nê, chi k’ètsapè i j’inpou. Lè pye retso chon lè pye abilo a chi trafi. N’in d’a dè ti lè parti: di nê, di bian, di rodzo, di orandzo, mimamin di vê. Po korbâ la Lê n’in d’a rin a betâ dèvan.

Di j’ôtro, avu lè moyin ke l’an ora, l’an trovâ la ruja po lè dèkrouvâ è lè dènonhyi. To chin va bayi ouna pechinta grôcha buya. I vêyo dza di rèjiman dè j’avoka lou kore apri è lè kortijâ po lè dèfindre. Di chèanthè dè tribunô intêrminâbyè po pou dè rèjulta prou chure.

In apri dè chin, l’ardzin ke hou prothè l’ou j’arè fê gânyi, lè j’avoka le rèbetèron-the din on panê nê? Alâdè chavê!

Anne Marie Yerly

Grande lessive

C’est le printemps, les gens ont envie de faire grand ménage. Dans le monde depuis quelques jours… on fait la même chose. Les journaux nous soulent de nouvelles les plus laides. Vous m’avez compris: les nouveaux scandales financiers.

De gros bonnets, de toutes couleurs, se font piéger: ils n’ont pas mis tous leurs œufs dans le même panier. L’argent noir, on le met dans le panier noir, celui qui échappe aux impôts. Les plus riches sont les plus habiles à ce trafic. Il y en a de tous les partis, des noirs, des blancs, des rouges, des oranges et même des verts… Pour courber la Loi, il y en a point à mettre devant.

D’autres, avec les moyens que l’on a aujourd’hui, ont trouvé la ruse pour les découvrir et les dénoncer. Tout cela va donner une puissante et gosse lessive. Je vois déjà des régiments d’avocats leur courir après et les courtiser pour les défendre. Des séances de tribunaux interminables pour peu de résultat c’est à craindre.

Après ça, l’argent que ces procès leur aura fait gagner, les avocats le remettront-ils dans un panier noir? Allez savoir.

Anne Marie Yerly