Totè lè chenannè, fô trovâ ôtyè po betâ din vouthron Deché-delé. Chti matin l’é kudji foyatâ lè papê po trovâ on choudzè vayâbyo.

Raoudzê! L’é trovâ tyè di krimo, di j’akchidin, di j’atanta (po chi mo, fudrè dyora trovâ on mo patê, du le têrmo ke l’è a la mouda). Le mondo l’è fou!

Che vo yêdè la pâdze di lètrè ke lè dzin invouyon i rèdakchyon di gajètè, l’i a gayâ tyè di rônèri. Du tin j’in tin ouna lètra dè fèlichitachyon po na boun’akchyon, on chêrvucho rindu, ma n’in d’a pâ on mache. Adon po chè pyindre, n’in d’a gayâ prà. Du tin j’a ôtro, n’in d’a yon ke chè krê d’obedji d’èchpârdzemalâ cha kultura avu on mache dè mo k’on konprin pâ. Vo chédè prà ke la kultura, l’è kemin la konfiture: Min on n’in d’a, mé on l’inpantsè.

A la pâdze di chpore, on bokon d’èchpouâre kan mimo. L’i a adi di dzouno ke l’an le korâdzo dè kore è dè choutâ po chobrâ in bouna chindâ. On piti règrè po nouthron chanpyon dou mondo, le bolondji dè La Toua, ke porè pâ alâ a Rio. No j’arin prou chure onko la chorèprêcha dè le vêre firi kemin l’oura, chon piti drapô a rinda la route!

Vo vêdè don, li a adi dou bon a prindre din chi pouro mondo. Fudrè tâtchi d’oubyâ lè fou!

Anne Marie Yerly

Des nouvelles du monde

Toutes les semaines, il faut trouver quelque chose à mettre dans votre Deché-delé. Ce matin j’ai parcouru les journaux afin de trouver un sujet valable.

Sapristi! je n’ai trouvé que des crimes, des accidents, des attentats (ce mot, il va falloir bientôt trouver une traduction en patois, depuis le temps qu’il est à la mode). Le monde est fou

Si vous lisez la page des lettres que les lecteurs envoient aux rédactions des journaux, il n’y a presque que des râleurs. De temps en temps une lettre de félicitations pour une bonne action, un service rendu, mais il n’y en a pas des quantités. Alors pour se plaindre, il y en a pas mal. De temps à autre il y en a un qui se croit obligé d’étaler sa culture avec un tas de mots que l’on ne comprend pas. Vous savez bien que la culture, c’est comme la confiture: Moins on en a, plus on l’étend!

À la page des sports, un peu d’espoir quand même. Il y a encore des jeunes qui ont le courage de courir et de sauter pour rester en bonne santé. Un petit regret pour notre champion du monde, le boulanger de La Tour qui ne pourra pas aller à Rio. Nous aurons certainement encore la surprise de le voir filer comme le vent, son petit drapeau à raz de la route.

Vous voyez donc, qu’il y a encore du bon à prendre dans ce pauvre monde. Tachons d’oublier les fous!

Anne Marie Yerly