Chi drôlo dè mo, i fâ pâ tan dè chèta. Vo konyidè ti le rèvi: «La parola l’è d’êrdzin, la tyêja l’è d’ouâ.» L’è bin chovin veré. Ouê, ouê l’è na fèmala ke di chin. Prindè-le kemin vo vudrâ.

Kan on moujè bin, l’è lè j’indrê yô on dèvejè le min ke chon lè pye pèjubyo. Mon piti dê m’a de, ke ha biyôta intêrèrchè achebin lè bounè j’ârmè ke chon din lè kovin. Hô, n’in d’a pâ-mé tan, è chon pâ-mé tan dzouno, ma, fô krêre ke le patê l’ou pyé. Chè mèhyôn pâ dou mondo è dè chè mijérè. I fan pèjubyamin lou piti travô, on bokon dè kurti, kotyè konfiturè, kotyè bonbenichè. Lè pye dzounè mouênè lè van vindre chu lè martchi avu on galé fôri. Lè pratikè l’an dou pyéji a lè rinkontrâ. È pu mè krêyo kan mimo ke l’i a Kôkon l’è-hô, k’intin lou prèyirè.

Dèkouthè chin, le mondo brâmè. Chè tiron la chemocha po de l’afére dè rin. Chin kontâ lè dyêrè. Adon po chin, lè linvuè i viron! Lè a chi ke pou n’in kontâ di pye grôchè.

A nekoué ch’è fyâ? I brâmèri ou bin i mudo? On châdzo m’a chohyâ , vouè a midzoua: «Hou ke l’an touâ, prinnyon pye chovin la parola tyè hou ke l’an réjon.»

Anne Marie Yerly

Silence

Ce drôle de mot ne fait pas beaucoup de bruit. Vous connaissez tous le proverbe: «La parole est d’argent, le silence est d’or». C’est bien souvent vrai. Oui, oui, c’est une femme qui dit ça. Prenez-le comme vous voudrez.

Si l’on pense bien, c’est les endroits où l’on parle le moins qui sont les plus paisibles. Mon petit doigt m’a dit que ce billet intéressait aussi les bonnes âmes qui sont dans les couvents. Oh, il n’y en a plus beaucoup, et elles (ou ils) ne sont plus très jeunes, mais il faut croire que le patois leur plait. Ils ne se mêlent pas du monde et de ses misères. Ils font paisiblement leur petits travaux, un peu de jardin, quelques confitures, quelques biscuits. Les plus jeunes sœurs vont les vendre sur les marchés, avec un gentil sourire. Les clients ont du plaisir à les rencontrer. Et je crois tout de même qu’il y a Quelqu’un là-haut, qui entend leurs prières.

A côté de ça, le monde crie. On se chicane pour des riens. Sans compter les guerres. Alors pour ça, les langues tournent. C’est à celui qui peut en conter de plus grosses.

A qui se fier? Aux gueulards ou aux muets? Un sage m’a soufflé, aujourd’hui à midi: «Ceux qui ont tort prennent plus souvent la parole que ceux qui ont raison!»

Anne Marie Yerly