Vouètant’an, l’è ithre viyo!
Vo ritoulon di fyê tukan
Ke mèchenon, chyâ chin dzouyo
Atan le gramon tyè le bon gran.

Trinta mile dzoua, l’è ouna chyâye
Chu lè tsêrêrè dè la ya
Prenyin, din ouna mima kolâye,
Le bi chèlà è ouna rochya.

Chavi vouêrdâ a chi l’âdzo
Lè j’yè cherin d’on infanè.
Vouêrdâ le rèchpè dè chè tâtso
È djamé chobrâ in êrê.

No chin dzouno din la titha
Kan on moujè d’alâ in-an.
Ti lè dzoua l’è ouna fitha
Kanbin fô l’i alâ pye pyan.

Nouthra karkache no rapêlè
Ke no j’an katre kou vint’an.
Mafi, lè j’yè, lè j’oroyè,
Là panyi, l’an pâ-mé vint’an.

Ma, a vouètant’an no chin retso
Di chovinyi dou tin pachâ.
No vouêtin pâ mé le rèlodzo
Kan vin l’momin dè ch’abadâ.

To d’on kou, no no rèvirin,
No vêyin le chindê markâ,
L’i a portan pâ tan grantin.
Le tin chinbyè no j’ètsapâ.

Prà dè travô, prà dè pochyin.
Règrè dè hou ke chon modâ,
Le chovinyi chàbrè vayin;
No pyakin pâ dè lè j’amâ.

No j’an bâti nouthron foyidzo
Nouthrè j’infan no fan pyéji.
Rèvinyon chovin ou chitso
Lè grô, lè moyin, lè piti.

No chin dèvinyê di j’anhyan,
Dèmandin a Nouthra Dona
Dè no j’apoyi kotyè j’an,
Dèvan dè rèchyêdre la korna.

A vouètant’an, chè fô pâ pyindre
Nouthra ya no j’a bin vouêthâ.
Infan, êmi, puon no rèdjindre,
L’I a prou pyêthe po ch’atrabyâ.

Djan Dzojè