Ché pâ che vo j’ithè kemin mè, ma la yuva dè chi Trump k’lè kandida po diridji l’Amérike mè fâ a pouêre. Pêrmô k’lè archi-milyonêre, chè krê to pêrmi è li a ouna fathon dè chè betâ in n’an ke fâ a gurlâ. I l’é dou mô dè konprindre ke prâ dè dzin dè chon payi pouéchon vôtâ por on omo ache grobo. Fô krêre ke no j’an pâ la mima aproutse di dzin è dou mondo k’lè j’Amérikin. Ma toparê, on a dè tyè ithre in pochyin, kan on moujè ke chi l’omo chè krê atsetâ le mondo avu ch’n’êrdzin è to le richto dê alâ avouê. I fô achebin dre ke le préjidan d’Amériik l’ a on tarubyo povê chu le mondo. Adon no j’an le drê d’avi pouêre dou rèjulta di j’èlèkchyon dou vouète dou mê ke vin.

Dou dzoua dèvan, din nouthro tyinton, no van vôtâ po dèjinyi nouthrè j’otoritâ. L’afére l’i è bin mi inmandya. Lè j‘èlèkteu l’ an lè pi chu têra è no j’an la tsanthe dè povê fére nouthron choâ chu di dzin dè rèthèta. Bin chur ke bayèrè a batayi, tsakon di parti vou ithre mèyà tyè lè j’ôtro. Ma ou bè dou konto lè dzin l’an l’èpâhyo dè ch’arèthâ chu lè kandida k’lou konvin le mi è ke pouéchan le mi lè dèfindre.

No j’an la tsanthe din nouthron payi. Po to chin ke chè dèchidè, l’è le chitoyin ke pou avê le dêri mo. Bin chur ke fô chovin grantin po tsandji lè tsoujè. Din ti lè ka, fô pâ tru chè pyindre, kan on vê din prà dè payi kemin l’afére lè puri, è ke lè j’otoritâ chin foton pyin lè fatè. Adon, por no, l’è le momin dè chè dèchidâ è chuto d’alâ vôtâ.

Vonvon Kolly

Des élections à venir

Je ne sais pas si vous êtes comme moi, mais la vue de ce Trump qui est candidat pour diriger l’Amérique me fait peur. Parce qu’il est archi-millionnaire, il se croit tout permis et il a une façon de se mettre en avant qui fait trembler. J’ai du mal de comprendre que beaucoup de gens de son pays puissent voter pour un homme aussi grossier. Il faut croire que nous n’avons pas la même approche des gens et du monde que les Américains. Mais tout de même, on a de quoi être en souci quand on pense que cet homme croit acheter le monde avec son argent et tout le reste doit aller avec. Il faut aussi dire que le président d’Amérique a un terrible pouvoir sur le monde. Alors, on a le droit d’avoir peur du résultat des élections du 8 du mois qui vient.

Deux jours avant, dans notre canton, on va voter pour désigner nos autorités. L’affaire est beaucoup mieux emmanchée. Les électeurs ont les pieds sur terre et on a la chance de pouvoir faire notre choix sur des gens aguerris. Bien sûr que ça donnera à batailler, chacun des partis veut être meilleur que les autres. Mais au bout du compte, les gens ont la possibilité de s’arrêter sur les candidats qui leur convient le mieux et qui puissent le mieux les défendre.

Nous avons de la chance dans notre pays. Pour tout ce qui est décidé, c’est le citoyen qui peut avoir le dernier mot. Bien sûr qu’il faut souvent longtemps pour changer les choses. Dans tous les cas, il faut pas trop se plaindre, quand on voit dans beaucoup de pays comme l’affaire est pourri, et que les autorités s’en foutent plein les poches. Alors, pour nous, c’est le moment de se décider et surtout d’aller voter.