L’è arouvâye dè né, to bounamin, chin chèta. Ou matin, to irè bian. L’a ramachâ avu li lè dêrirè foyè. In kotyè dzoua, lè j’âbro vê l’an pachâ rochè, pu ora chon bi bian. Lè dzà chon balè!

Dè gran matin on intin kotyè kou dzubyâ lè ràvouè di j’oto, l’è le momin dè tsandji lè pneu. Po hou ke l’an pâ fôta dè modâ ou travô, l’è le momin dè chè betâ a dzo po l’evê. No j’an rèvou lè bikini è teri in’an lè bounè.

Le kurti l’a teri la kouvêrta chu le nâ di dêri botyè, dinche lè dêri mônè chon inkaratâ. Lè tôpè l’an vanâ chu la vejena, l’ou j’é pâ léchi na rachena. Lè mayintsètè, lè tsêrdziniolè è achebin hou pouro chpatse, l’an dza bin intanâ lè rèvire-chèlà. Dèjo nouthrè j’ègrâ, din on galé ni dè foyè, on nirechon l’a fê chon yi, l’i rèvin ti lè j’outon.

Ha bouna nê ke fâ le bouneu di chkiyeu è di « karochyé », fâ achebin le bouneu de la têra. Ma dona dejê: «La nê, l’è le fèmê di pouro!» In pyathe dè li betâ di j’angré pojon, de la bourtyâ k’on châ pâ chin ke l’i a dedin; la nê rinpyathè to chin, to bounamin, chin chèta.

Vo kouâjo on evê pèjubyo.

Anne Marie Yerly

Première neige
Elle est arrivée la nuit , tout doucement, sans bruit. Au matin, tout était blanc. Elle a emporté avec elle les dernières feuilles. En quelques jours, les arbres verts ont passé au roux, et voilà qu’ils sont blancs. Les forêts sont belles.

De grand matin on entend parfois glisser les roues des voitures, c’est le moment de changer les pneus. Pour ceux qui n’ont pas besoin de partir au travail c’est le moment de se mettre au chaud pour l’hiver. On a rangé les bikinis et sorti les bonnets.

Le jardin a tiré la couverture sur le nez des dernières fleurs, ainsi les dernières mauvaises herbes sont cachées. Les taupes ont filé chez la voisine, je ne leur ai pas laissé une racine. Les mésanges, les chardonnerets et aussi ces pauvres moineaux ont déjà bien entamé les tournesols. Sous notre escalier, dans un joli nid de feuilles, un hérisson a fait son lit, il y revient tous les automnes.

Cette bonne neige, qui fait le bonheur des skieurs et des carrossiers, fait aussi le bonheur de la terre. Ma maman disait: «La neige est le fumier des pauvres.» Au lieu d’y mettre des engrais empoisonnés, de la drogue dont on ne sait ce qu’elle contient; la neige remplace tout ça, tout doucement, sans bruit.

Je vous souhaite un hiver paisible.

Anne Marie Yerly